Álemdik BAQ-taǵy Qazaqstan: Alǵashqy AES qurylysy, JI-fılmge bólingen qarjy jáne dári-dármek ımporty
ASTANA. KAZINFORM – Bul aptada álemdik basylymdar Qazaqstan jaıly birshama jańalyq jarııalady. Reseı Prezıdenti Vladımır Pýtınniń memlekettik saparynda qol qoıylǵan qujattar, Qytaı kólikteriniń kóbeıýi jáne Tokıo gýbernatory ıÝrıko Koıkeniń Astananyń damý baǵdaryna qatysty pikiri talqylanǵan. Jasandy ıntellekt kómegimen jasalatyn kınotýyndyǵa beriletin qarjy men dári-dármek ımporty týraly aqparat bar. Tolyǵyraq Kazinform tilshisiniń sholýynan oqyńyz.
Reuters: AES qurylysyna qatysty kelisimge qol qoıyldy
Reseı Prezıdenti Vladımır Pýtın Qazaqstanǵa memlekettik saparmen kelgen bolatyn. Sapar aıasynda beısenbi kúni Qazaqstan men Reseı quny 16,5 mıllıard dollar bolatyn alǵashqy AES-ti salý týraly kelisimge qol qoıdy. Somanyń bir bóligi Máskeý usynatyn iri eksporttyq nesıe esebinen ótelmek. Aqparatty Reuters taratty.
Qazaqstan atom energııasyn paıdalaný múmkindigin jıyrma jyldan beri talqylap keledi. 2024 jyly referendýmda AES-ti salýdy qoldaý týraly sheshim qabyldanyp, onyń orny retinde Balqash kóliniń jaǵasyndaǵy Úlken aýyly tańdalǵan.
– Búgin qol qoıylǵan «Balqash» atom elektr stantsııasyn salýǵa qatysty kelisimderdiń strategııalyq mańyzy zor, – dep málimdedi Prezıdent Qasym-Jomart Toqaev.
Osydan keıin ol kelissóz júrgizý úshin Astanaǵa kelgen Reseı Prezıdenti Vladımır Pýtınge kórsetken qoldaýy úshin alǵys aıtty.
– Elektr stantsııasynyń iske qosylýy Qazaqstan ekonomıkasyn energııamen qamtamasyz etýge eleýli úles qosady, – dedi Vladımır Pýtın.
Qazaqstannyń Atom energııasy jónindegi agenttiginiń málimetinshe, stantsııa qurylysynda jetekshi róldi Reseıdiń «Rosatom» memlekettik atom korporatsııasy ıelengen. Kelisimge sáıkes, Balqashtaǵy AES-te eki VVER-1200 III+ reaktory ornatylady. Qurylys 2027 jyly bastalyp, alǵashqy reaktordy 2034 jyldyń basynda iske qosý josparlanǵan.
Euronews: Tokıo gýbernatory tájirıbe almasýǵa úndedi
Astanaǵa arnaıy kelgen Tokıo gýbernatory ıÝrıko Koıke Euronews arnasyna suhbat berdi. Áńgime barysynda shahardy damytýǵa qatysty sýtegi energetıkasy, jasandy ıntellektini ilgeriletý jáne qaýipsizdik taqyrybynda pikir bildirgen.
Onyń aıtýynsha, Astanada «jasyl» sýtegin damytý qajet. Ol úshin qubyr jelileri, qoımalar sekildi ınfraqurylymǵa qomaqty ınvestıtsııa tartýdy usyndy.
ıÝrıko Koıke AlemAI jetekshi jasandy ıntellekt ortalyǵyn joǵary baǵalap, álem astanalary ozyq tájirıbeni ózara bólisý kerek degen oı aıtty.
Gýbernatordyń paıymynsha, Qazaqstan men Japonııa arasynda 2025 jyldyń jeltoqsanynda qol qoıylǵan tsıfrlyq damý men qala turaqtylyǵy týraly memorandým seriktestikti odan ári ilgeriletýde.
TASS: JI-fılmder festıvaliniń júlde qory 1 mıllıon dollarǵa jetti
28 qyrkúıek pen 1 qazan aralyǵynda ótetin Astana AI Film Festival festıvaliniń júlde qory 1 mıllıon dollardy quraıdy. Bul týraly TASS aqparat agenttigi festıvaldiń resmı saıtyna silteme jasap habarlady.
Bul – álemdik AI-festıvalder arasyndaǵy eń iri júlde qory. Buǵan deıin mundaı soma tek Dýbaıdaǵy One Billion Forum aıasynda berilgen, onyń ózinde búkil júldeni tek bir jeńimpaz ıelengen bolatyn. Al Qazaqstanda syıaqy birneshe avtorǵa berilmek.
Uıymdastyrýshylardyń málimetinshe, jobaǵa qatysý úshin uzaqtyǵy 10 mınýtqa deıingi qysqametrajdy AI-fılm túsirip, ony jobanyń sıpattamasymen birge aaiff.ai festıval platformasyna júkteý qajet.
Caspianpost: Qazaqstan dári-dármek ımportyna aýqymdy reforma jasaýdy josparlap otyr
Qazaqstan AQSh pen Eýropada óndiriletin dári-dármekti bekitý jáne ımporttaý protsesin jedeldetýge yqylas tanytýda. Jańa erejege sáıkes, AQSh-tyń Azyq-túlik jáne dári-dármek sapasyn baqylaý basqarmasy (FDA) jáne Eýropalyq dári-dármek agenttigi (EMA) sekildi halyqaralyq uıymdar maquldanǵan dárilik preparattarǵa Qazaqstan naryǵyna shyǵýǵa nebári 15 kún ishinde ruqsat beriledi. Aqparatty Caspianpost bólisti.
Májilis depýtaty Ashat Aımaǵambetovtiń aıtýynsha, bastama qaýipsizdik standarttaryn saqtaı otyryp, qajetsiz bıýrokratııany joıýǵa baǵyttalǵan. Reforma halyqaralyq synaq pen sertıfıkattaýdan ótken dárilik preparattardyń tıimdi ári praktıkalyq júıesin qurýǵa kómektesedi.
The Times of Central Asia: Qytaılyq elektromobıl sany bes ese artty
Bıyl qańtar men sáýir aralyǵynda resmı dılerler jańa energııa kózderimen júretin kólikter (NEV) segmentinde 2122 qytaılyq jeńil avtokólikti satqan. Bul – ótken jyldyń sáıkes kezeńimen salystyrǵanda bes ese kóp. Qazaqstan avtokólik odaǵynyń málimetin The Times of Central Asia jarııalady.
Eń úlken saýda gıbrıdti modelder men júris qory ulǵaıtylǵan avtokólikterge tıesili: 1499 kólik satylǵan. Al tolyqtaı elektrli 623 kólik ıesin tapqan.
