Álemdik BAQ-taǵy Qazaqstan: AQSh-pen keńes, «Altyn vıza» jáne «Jylyoı» jobasy

ASTANA. KAZINFORM – Sáýirdiń sońǵy aptasynda álemdik aqparat keńistigindegi Qazaqstan habary údedi. 80 jyldan keıin elge jetkizilgen maıdanger súıegi, sheteldikterge arnalǵan «Altyn vıza» baǵdarlamasynyń iske qosylýy, Qytaıdyń alyp uıymy – CNOOC kompanııasynyń naryqqa enýi kóp qaýzalǵan. Tolyǵyraq Kazinform tilshisiniń sholýynan oqyńyz.

Trend: Investorlarǵa arnalǵan vıza engizildi 

Syrtqy ister mınıstrliginiń bastamasymen ınvestıtsııalyq áleýetti arttyrý maqsatynda ınvestorlyq vıza alýdyń erejesi bekitildi. Jańa baǵdarlamanyń egjeı-tegjeıin Trend aqparat agenttigi jarııalady.

Atalǵan vıza Qazaqstanda 10 jylǵa deıin turýǵa ruqsat alýǵa múmkindik beredi. Mınıstrliktiń sózinshe, mundaı qadam Qazaqstannyń halyqaralyq bızneske jaqyndaýyn jáne uzaqmerzimdi iskerlik seriktestikti damytýǵa septespek. Sondaı-aq «Altyn vızalar» sheteldik ınvestorlar úshin qolaıly orta qalyptastyryp, zańdy kepildikter berýge jáne eldiń ınvestıtsııalyq ahýalyn senimdi nyǵaıtýǵa baǵyttalǵan. Eldiń ashyqtyqqa, kapıtaldy qorǵaýyna jáne turaqty halyqaralyq ekonomıkalyq baılanystardy damytýyna da kómegi zor.

«Jańa talaptarǵa sáıkes, Qazaqstan kompanııalarynyń jarǵylyq kapıtalyna nemese otandyq baǵaly qaǵazdarǵa keminde 300 000 AQSh dollary kóleminde ınvestıtsııa salǵan shetel azamattary ınvestorlyq vızany resimdeý úshin elektrondy ótinish bere alady. Bul «altyn vıza» Qazaqstanda 10 jylǵa deıin turýǵa ruqsat alý múmkindigin kózdeıdi.», – delingen resmı habarlamada.

Mundaı vızalyq baǵdarlamalar Eýropa, AQSh, BAÁ jáne Sıngapýrda keńinen qoldanylady. Qazaqstan da kapıtaldy qorǵaýǵa jáne turaqty halyqaralyq ekonomıkalyq baılanystardy damytýǵa baǵyttalǵan bastamany qolǵa aldy. Búginde «Altyn vızaǵa» qatysty qujat rásimdeldi, 10 kúnnen keıin zańdy kúshine enedi. Sol kezde ınvestorlardan ótinish qabyldanatyn bolady.

Anadolu: Tarıfter boıynsha AQSh-pen konsýltatsııa júrgizilýde

Qazaqstan AQSh-tyń kedendik baj salyǵy tarıfterine qatysty ózara keńesti bastady. Aldyn ala boljam boıynsha, másele Dúnıejúzilik saýda uıymynyń alańynda talqylanatyn bolady. Saýda jáne ıntegratsııa mınıstrliginiń málimdemesin túrkııalyq Anadoluaqparat agenttigi taratty.

Kelissózderdiń bastalǵanyn QR Saýda jáne ıntegratsııa mınıstrliginiń Syrtqy saýda qyzmeti departamentiniń dırektory Serik Áshıtov jetkizdi.

«9 sáýirde Amerıka Qurama Shtattary joǵary tarıfti engizý jumystaryn 90 kúnge keıinge qaldyratynyn jarııalady. Búginde Qazaqstan Úkimeti elimizge joǵary tarıf engizilmeýi úshin AQSh-pen keńesti bastady», — dedi Serik Áshıtov.

Onyń aıtýynsha, AQSh engizip jatqan sharalar Amerıkaǵa baǵyttalatyn qazaqstandyq eksporttyń 4,8 paıyzyna ǵana áser etedi. AQSh-qa baǵyttalatyn, qazaqstandyq eksporttyń shamamen 90 paıyzy munaı, ýran, kúmis, ferroqorytpa sekildi negizgi eksport taýarlaryna bul ereje júrmeıdi.

«Tarıfter Qazaqstan eksportyna aıtarlyqtaı áser etedi deýge negiz joq. Soǵan qaramastan Úkimet pen Saýda jáne ıntegratsııa mınıstrligi osyndaı birjaqty sharalardyń saldaryn azaıtý jáne saýda qatynasyn nyǵaıtý úshin amerıkalyq áriptestermen jumysty jalǵastyrady», – dedi departament basshysy.

Eske salaıyq, buǵan deıin AQSh prezıdenti Donald Tramp shetelden ákelinetin barlyq taýarǵa qoıylatyn kedendik baj salyǵyn kóteretinin aıtty. Bazalyq tarıf 10 paıyz deńgeıinde, alaıda ol kóptegen memleket úshin joǵary bolmaq. Keıinirek Tramp Qytaıdan basqa elderge qatysty ózara baj salyǵyn 90 kúnge toqtatý týraly sheshim qabyldaǵan edi.

Report: «QazMunaıGaz» ben qytaılyq CNOOC «Jylyoı» jobasy týraly kelisimge keldi

«QazMunaıGaz» ulttyq kompanııasy qytaılyq China National Offshore Oil Corporation International Limited kompanııasymen Atyraý oblysyndaǵy Jylyoı ýchaskesin geologııalyq barlaý jónindegi kelisimge keldi. «QazMunaıGaz» jáne «CNOOC» qarjylandyrýǵa qatysty jáne birlesken qyzmet týraly kelisimderge qol qoıǵan. AqparattyReportagenttigi bólisti.

«Jylyoı» jobasy Kaspıı teńiziniń soltústik-shyǵys bóliginiń tranzıttik aımaǵynda ornalasqan, aýdany 960 sharshy shaqyrymǵa jýyq ýchaskede iske asyrylatyn bolady. CNOOC-pen Jylyoı geologııalyq barlaý jónindegi birlesken kásiporyn ótken jyldyń qazan aıynda quryldy.

«QazMunaıGaz» UK AQ Basqarma tóraǵasynyń birinshi orynbasary Qurmanǵazy Esqazıev jáne CNOOC kompanııasynyń Reseı men Ortalyq Azııadaǵy jobalar jónindegi bas menedjeri Lıý Bo kezdesýinde osy joba týraly mámile jasalǵan. ıAǵnı, 3D seısmıkalyq barlaý (dalalyq jumystar, 400 sharshy shaqyrymdaǵy derekti óńdeý jáne taldaý), 2D negizde 400 boılyq shaqyrym derekti qaıta óńdeý, 2000 shaqyrym tereńdikte tuzústi barlaý uńǵymasyn burǵylaý, 3D seısmıkalyq barlaý derekteriniń nátıjelerine qaraı tereńdigi 4500 metr tuzasty barlaý uńǵymasyn burǵylaý júzege aspaq.

«Aıta ketsek, CNOOC Qazaqstanǵa alǵash ret ınvestıtsııa quımaqshy. Kompanııa ony geologııalyq barlaý jobalarynan bastap otyr. Seriktestik «Jylyoı» geologııalyq barlaý jobasyn 50/50 tepe-teń talaptarmen birlesip iske asyrýdy kózdeıdi. Bul rette barlaý kezeńin CNOOC qarjylandyratyn bolady», – delingen resmı habarlamada.

TASS: Astanaǵa qazaqstandyq UOS jaýyngerleriniń súıegi jetkizildi

QR Qarýly kúshteri áskerı-kóliktik avıatsııasynyń ushaǵy UOS jyldarynda qaza tapqan qazaqstandyq jaýyngerler Orazǵalı Aıbolanuly Belýbaev pen Petr Kapıtonovıch Okonechnıkovtyń súıegin Máskeýden Astanaǵa jetkizdi. Jańalyqty reseılik TASS habarlady.

Mınıstrliktiń málimetinshe, Orazǵalı Belýbaevty Reseıdegi Novgorod oblysynyń Sobolevo aýylyndaǵy izdeý jumysy barysynda «Nahodka» jasaǵynyń músheleri tapqan. Onyń janynan beldikter, ilgekter, qalta pyshaǵy jáne medalon tabylypty. Sonyń nátıjesinde onyń 1908 jyly týǵany anyqtalǵan.

Maıdanger Orazǵalı Belýbaev 1941 jyldyń jazynda Semeı oblysynyń Órnek kolhozynan maıdanǵa shaqyrylǵan eken. 1943 jyly tamyzda Novgorod oblysy Staraıa Rýssa qalasy úshin bolǵan shaıqasta qaza tapqan. Batyrdyń súıegi Abaı oblysy Zýbaıyr aýylynda qaıta jerlenetin bolady.

«8-shi avıatsııa polkiniń bortradısi serjant Petr Okonechnıkovtyń súıegi Reseı Geografııalyq qoǵamy men Reseı Federatsııasy Qorǵanys mınıstrliginiń Alıaska-Sibir áýe trassasynyń nysandaryn zertteý ekspedıtsııasy kezinde tabylǵan», – dedi mınıstrlik ókilderi.

Petr Okonechnıkov 1924 jyly dúnıege kelgen. Ol Shyǵys Qazaqstan oblysy Zyrıan aýdany Kýtıha aýylynyń týmasy. 1943 jyly 28 tamyzda «Dýglas» Sı-47 ushaǵynda jaýyngerlik tapsyrmany oryndaý barysynda apatqa ushyrady. Múrdeniń janynan ushý kartasy, sondaı-aq №9248726 nómirli qazaq tilinde toltyrylǵan komsomol bıleti tabylǵan. Petr Okonechnıkov Shyǵys Qazaqstan oblysy Altaı qalasynda qaıta jerlenedi