Álemdik BAQ-taǵy Qazaqstan: $6 mlrd qarajat, Halyq Keńesi jáne Astanadaǵy ÝEFA Sýperkýbogy
ASTANA. KAZINFORM – Bul aptada álemdik basylymdar Qazaqstan jaıly birshama jańalyq jarııalady. Sonyń ishinde áskerı qyzmetshilerdiń qaza bolýyna baılanysty aza tutý kúniniń jarııalanýy, Halyq Keńesi quramynyń bekitilýi jáne Azııa ınfraqurylymdyq ınvestıtsııalar bankinen alatyn 6 mlrd dollar týraly aıtylǵan. Qazaqstan-Qytaı yntymaqtastyǵy men 2028 jyly ÝEFA Sýperkýbogyn Astanada uıymdastyrýǵa qatysty aqparattar da bar. Tolyǵyraq Kazinform tilshisiniń sholýynan oqyńyz.
Jiji Press: Qazaqstanda jalpyulttyq aza tutý kúni jarııalandy
Mańǵystaýda áskerı qyzmetshilerdiń qaza bolýyna baılanysty Qazaqstanda aza tutý jarııalandy. Aqparatty japondyq Jiji Press basylymy bólisti.
2026 jylǵy 24 qyrkúıekte Qazaqstandaǵy Kaspıı teńizindegi áskerı oqý-jattyǵý kezinde 14 áskerı qyzmetshi qaza tapqan.
The Times of Central Asia: ÝEFA Sýperkýbogy 2028 jyly Astanada ótedi
Astana eýropalyq klýbtyq fýtboldaǵy mańyzdy matchtarynyń birin qabyldaıdy. ÝEFA Atqarýshy komıteti 2028 jylǵy Sýperkýbok oıynyn Astanadaǵy «Astana Arenada» ótkizý týraly sheshim qabyldady. Jańalyqty The Times of Central Asia taratqan.
Sheshim 15 qyrkúıekte Salonıkıde ótken ÝEFA Atqarýshy komıtetiniń otyrysynda qabyldandy. Osylaısha, Qazaqstan Ortalyq Azııadaǵy ÝEFA Sýperkýbogy úshin match ótkizetin alǵashqy el atanady.
Bul joly Chempıondar lıgasy men Eýropa lıgasynyń jeńimpazdary baq synasady. Qarsylas komandalardyń esimi 2027/28 jylǵy eýrokýbok maýsymynyń qorytyndysy boıynsha anyqtalmaq. Osylaısha, Qazaqstandaǵy jankúıerler alǵash ret Eýropanyń eki basty klýbtyq týrnıriniń jeńimpazdary arasyndaǵy jekpe-jekti óz kózderimen tamashalaıdy. Al 2027 jyly Sýperkýbok Amsterdamdaǵy «Iohan Kroıf Arenada» ótedi dep josparlanǵan.
Match aldynda «Astana Arenada» qaıta jańǵyrtý jáne ınfraqurylymdy josparly jańartý jumystary júrgiziledi. Ásirese alańdaǵy kógaldy aýystyrý jumystary júrgizilýi múmin. Mundaı qadam stadıonnyń ÝEFA-nyń iri eýropalyq fınaldardy ótkizýge qoıylatyn qatań talaptaryna oryndaý úshin kerek.
TASS: Toqaev Halyq Keńesiniń quramyn bekitti
Qazaqstan Halyq Keńesiniń quramy bekitildi. Memleket basshysy tıisti Jarlyqqa qol qoıdy. Keńes quramyna 126 adam engen. Bul týraly reseılik TASS aqparat agenttigi jazdy.
Qazaqstan Halyq Keńesi – Konstıtýtsııaǵa sáıkes, Qazaqstan halqynyń múddesin bildiretin joǵary konsýltatıvtik organ. Onyń negizgi mindetteri – memlekettiń ishki saıasatynyń negizgi baǵyttaryna qatysty, qoǵamdyq kelisim, jalpyulttyq birlik pen yntymaqty nyǵaıtý jóninde usynystar ázirleý. Keńeske zańnamalyq bastama kóterý quqyǵy da berilgen.
Halyq Keńesi quramynda ár oblystyń máslıhat depýtattary, azamattyq qoǵam men qoǵamdyq birlestikterdiń ókilderi bar.Keńes quramyna qoǵam qaıratkerleri, joǵary oqý oryndarynyń qyzmetkerleri, Qazaqstannyń etnomádenı birlestikteriniń ókilderi, qos palataly parlamenttiń burynǵy depýtattary, bıznes ókilderi men dıplomattar kirdi.
Caspianpost: Qazaqstan Azııa ınfraqurylymdyq ınvestıtsııalar bankinen 6 mlrd dollarǵa deıin qarjy tartady
Qazaqstan Azııa ınfraqurylymdyq ınvestıtsııalar bankimen (AIIB) yntymaqtastyq jasaý týraly kelisim ratıfıkatsııalanǵan bolatyn. Endi Úkimet qarjy uıymynan 6 mlrd AQSh dollaryna deıin qarjy tartýdy josparlap otyr. Bul týraly Premer-mınıstrdiń orynbasary – Ulttyq ekonomıka mınıstri Serik Jumanǵarın málimdegen. Mınıstr sózin Caspianpost jetkizdi.
Josparlanǵan qarjynyń jumsalý baǵyty aıqyndalǵan. Mınıstrdiń málimetine súıensek, oǵan kólik, energetıka, densaýlyq saqtaý jáne qarjy salalaryndaǵy jalpy somasy 5,3 mlrd dollardy quraıtyn 17 joba kiredi.
– Ratıfıkatsııadan keıingi alǵashqy bes jylda negizdemelik kelisim kólik, energetıka, densaýlyq saqtaý jáne jasyl qarjylandyrý sııaqty salalarǵa el ekonomıkasyna shamamen $6 mlrd kóleminde jeńildik sharttarmen qosymsha «uzaq merzimdi aqsha» tartýǵa múmkindik beredi, – dedi Serik Jumanǵarın.
Xinhua News: Qazaqstan men Qytaı ıntymaqtastyqty arttyrady
Seısenbi kúni Beıjińdegi Halyq jınalystary úıinde Premer-mınıstriniń birinshi orynbasary Nurlybek Nálibaev pen QHR Memlekettik keńesiniń vıtse-premeri Dın Sıýesıan kezdesti. Jańalyqty qytaılyq Xinhua News habarlady.
Dın Sıýesıan Qytaı men Qazaqstandy jaqyn kórshiler, jaqsy dostar jáne senimdi seriktester dep baǵalaǵan. Onyń aıtýynsha, budan kóp uzamaı eki eldiń basshylary Bishkekte ótken Shanhaı yntymaqtastyq uıymy sammıtine jáne BRIKS elderi kóshbasshylarynyń kezdesýine birge qatysty. Bul jahandyq basqarý júıesin reformalaý men jetildirýge jańa serpin berdi.
QHR vıtse-premeri eki el basshylarynyń tapsyrmalaryn júzege asyrý jáne halyqtardyń ıgiligi úshin Qazaqstan tarapymen tyǵyz jumys isteýge daıyn ekenin bildirdi.
