Álemdik BAQ-taǵy Qazaqstan: $5,2 mlrd ınvestıtsııa, telekommýnıkatsııa jáne Potter poıyzy
ASTANA. KAZINFORM – Qyrkúıek aıynyń sońynda Qazaqstanǵa qatysty jańalyqtar álemdik aqparat quraldarynda belsendi túrde jarııalandy. Birinde eldiń AQSh-pen iri ınvestıtsııalyq jobalarǵa qol qoıǵany aıtylsa, endi birinde Qazaqstannyń jasyl qarjylandyrý jáne energııa saqtaý salasyndaǵy jańa bastamalary sóz boldy. Sonymen qatar, Ózbekstanmen telekommýnıkatsııalyq yntymaqtastyq, sondaı-aq mádenı-oıyn-saýyq poıyzdarynyń iske qosylýy da nazarda boldy. Tolyǵyraq Kazinform agenttiginiń sholýynan oqı alasyz.
TASS: Qazaqstan men AQSh $5,2 mlrd ınvestıtsııalyq jobalarǵa qol qoıdy
Qazaqstan men AQSh kompanııalary 11 qujatqa qol qoıyp, el ekonomıkasyna $5,2 mlrd ınvestıtsııa tartýdy kózdep otyr. Bul kelisimder Qazaqstan Prezıdenti Qasym-Jomart Toqaevtyń Nıý-Iorkke jasaǵan jumys sapary kezinde jasaldy. Jańalyqty reseılik TASS jazdy.
Maqalada Qazaqstan men AQSh arasyndaǵy qujattar strategııalyq mańyzdy salalardy – kólik, logıstıka, energetıka jáne aqparattyq tehnologııalardy qamtıtyny týraly aıtylǵan. Kelisimge qol qoıǵan taraptar qatarynda qazaqstandyq kompanııalar bar. Atap aıtqanda, olar – «Qazaqtelekom», «Qazaqstan temir joly», «Samuryq-Qazyna», «QazMunaıGaz». AQSh tarapynan Amazon Kuiper, International Finance Corporation, Lummus Technology, Exxon Mobil, Chevron, LanzaJet, Wabtec jáne AQSh-tyń Eksport-ımport banki bar.
Prezıdent Qasym-Jomart Toqaev 21 qyrkúıekte AQSh-qa jumys saparymen bardy. Sapar barysynda ol AQSh saýda mınıstri Govard Lıýtnıkpen kezdesip, iri amerıkandyq kompanııalardyń ókilderimen dóńgelek ústel ótkizdi. Kezdesý barysynda Toqaev qatysýshylardy Qazaqstanǵa ınvestıtsııa salýǵa shaqyryp, memleket tarapynan qoldaýdyń bar ekenin jetkizdi. Sonymen qatar, Wabtec kompanııasymen 300 lokomotıv jetkizýge arnalǵan kelisimge qol qoıylǵany jarııalandy, onyń jalpy somasy - 4,2 mıllıard AQSh dollary.
Euronews: Qazaqstan – jasyl qarjylandyrý, energııany saqtaý jáne Eýropaǵa jańa energetıkalyq dáliz
Qazaqstan jańartylatyn energııa kózderin jáne jasyl qarjylandyrý kólemin arttyra otyryp, shyǵaryndylardy azaıtýǵa jáne Ortalyq Azııanyń taza energetıkasy úshin tranzıttik hab retinde ózin kórsetýge nıettenip otyr. Aqparatty Euronews taratty.
El jasyl ekonomıkaǵa tezirek kóshýge kúsh salýda, alaıda klımattyq qarjylandyrý kólemi áli de shekteýli. Qazaqstandaǵy elektr energııasynyń 70%-y áli de kómir arqyly óndiriledi, degenmen el bes jyldyń ishinde shyǵaryndylardy 15%-ǵa qysqartýdy josparlap otyr. Salyqtyq jeńildikter men óndirýshilermen 20 jyldyq kelisimder arqyly jańartylatyn energııa jobalary 8 mlrd eýroǵa baǵalanýda. Sonymen qatar energııa saqtaý jobalary da iske qosylmaq. Osy oraıda, «Astana» Halyqaralyq qarjy ortalyǵy búkil Ortalyq Azııa boıynsha 3,3 mlrd eýro kólemindegi jasyl oblıgatsııalar naryǵyn damytýǵa at salysýda.
Sondaı-aq, Qazaqstan «Jasyl dáliz» jobasyna jetekshilik etedi – bul Eýropaǵa arnalǵan joǵary kerneýli elektr jelisi. Joba aımaqtyq seriktesterdiń qoldaýy jáne EO qarjylandyrýy arqasynda aımaqtaǵy jel jáne kún energııasynyń artyq ónimin jetkizýdi kózdeıdi. Osy arqyly Qazaqstan Ortalyq Azııadaǵy energetıkalyq ótý úderisindegi mańyzdy rólin kúsheıtýdi josparlap otyr.
Uza: Ózbekstan men Qazaqstan telekommýnıkatsııa salasyndaǵy yntymaqtastyqty kúsheıtedi
Tashkentte ótip jatqan «ICT Week Uzbekistan – 2025» aqparattyq-kommýnıkatsııalyq tehnologııalar aptalyǵy aıasynda «Ózbekstan telekommýnıkatsııa jelilerin basqarý respýblıkalyq ortalyǵy» memlekettik ýnıtarlyq kásiporny men Qazaqstannyń «ATS Mediafon KZ» JShS kompanııasy arasynda resmı kezdesý ótti. Bul týraly ózbekstandyq Uza jazdy.
Kelissózder barysynda telekommýnıkatsııa jelilerin basqarý júıesin jetildirý, bank salasyndaǵy alaıaqtyqqa qarsy zamanaýı sheshimderdi engizý baǵyttarynda yntymaqtastyqty damytý máseleleri talqylandy.
Taraptar tsıfrlyq tehnologııalardyń qarqyndy damýy jaǵdaıynda ózara yqpaldastyqta jumys isteýdiń mańyzdylyǵyn atap ótti. Sondaı-aq tıimdi kelisim telekommýnıkatsııa qyzmetteriniń kıberqaýipsizdigi men senimdiligin arttyrýǵa, paıdalanýshylardy alaıaqtyq pen zańsyz operatsııalardan qorǵaýǵa jol ashatynyna nazar aýdaryldy.
Kezdesý qorytyndysynda tájirıbe almasý, birlesken jobalardy ázirleý jáne bank salasyndaǵy alaıaqtyqqa qarsy kúreste is-qımyldardy úılestirýdi kózdeıtin ekijaqty yntymaqtastyq memorandýmyna qol qoıyldy. Atalǵan qujat eki memleket arasyndaǵy tsıfrlyq tehnologııalar, bank júıeleri jáne kıberqaýipsizdik salalaryndaǵy seriktestikti odan ári nyǵaıtýǵa qyzmet etedi.
Oxu: Qazaqstanda Garrı Potter poıyzy iske qosyldy
«Jolaýshylar tasymaly» AQ elektropoıyz jolaýshylaryna arnalǵan jańa mádenı-oıyn-saýyqtyq joba – «Potter poıyzyn» iske qosty. Jańalyqty ázerbaıjandyq Oxu ınternet basylymy bólisti.
Poıyzda balalar men olardyń ata-analary teatrlandyrylǵan baǵdarlamaǵa qatysa alady. Sapar barysynda qatysýshylar tanymal «Garrı Potter» keıipkerleriniń obrazynda óner kórsetetin akterlerdiń qatysýymen shoý kórip, ınteraktıvti elementter arqyly sıqyrly saıahat atmosferasyna ene alady. Árbir jas qatysýshyǵa estelik syılyq – sıqyrly taıaqsha tabys etiledi. Shoý tórt jańa vagonnan turatyn elektropoıyzda uıymdastyrylǵan.
Poıyz Astana-1 – Tastaq – Astana-1 marshrýty boıynsha júredi, baǵdarlama uzaqtyǵy – eki saǵat. Alǵashqy reıster 5 qazannan bastalady. Bılettiń naqty quny keıin habarlanatyn bolady.