Álemdik BAQ-taǵy Qazaqstan: $17 mlrd kelisim, Belarýspen jol kartalary jáne jańa áýe reısi
ASTANA. KAZINFORM – Qarasha aıynyń alǵashqy aptasynda Qazaqstan álemdik aqparat alańynda belsendi jarııalandy. El men AQSh arasyndaǵy kelisimderdiń jalpy somasy 17 mlrd dollardan asty, Belarýspen ónerkásip jáne saýda-ekonomıkalyq yntymaqtastyq týraly jol kartalary bekitildi. Astana men Belgrad arasynda tikeleı reıs ashyldy, al mal eksportyna shekteýler uzartyldy. Tolyǵyraq Kazinform agenttiginiń sholýynan oqı alasyz.
CentralAsia: Qazaqstan men AQSh 17 mlrd dollardan astam kelisimge qol qoıdy
Qazaqstan Prezıdenti Qasym-Jomart Toqaev pen AQSh Prezıdenti Donald Tramp Vashıngtondaǵy Aq úıde kezdesip, ekijaqty yntymaqtastyq máselelerin talqylady. Bul týraly CentralAsia jazdy.
Kezdesý barysynda eki el arasyndaǵy yntymaqtastyq máseleleri talqylanyp, kommertsııalyq kelisimderge qol qoıyldy. Kelisimderdiń jalpy somasy 17 mlrd dollardan asty. Qazaqstan prezıdenti AQSh-tyń álemdik kóshbasshylyq rólin atap ótip, beıbitshilik bastamalaryn, sonyń ishinde «TRIPP» baǵdarlamasyn qoldaıtynyn aıtty.
Donald Tramp Qazaqstanmen strategııalyq seriktestikti odan ári nyǵaıtýǵa daıyn ekenin rastady. Prezıdentter ekijaqty qatynastardyń negizgi baǵyttaryn talqylap, halyqaralyq kún tártibindegi mańyzdy máselelerdi qarastyrdy. Resmı kezdesýden keıin olar Aq úıdiń irgesinde turyp, jańadan salynyp jatqan saltanat saraıynyń qurylysyn kórdi.
Sapar barysynda Qazaqstan prezıdenti AQSh memlekettik hatshysy Mark Rýbıo jáne prezıdenttiń Ońtústik pen Ortalyq Azııa boıynsha arnaıy ókili Serdjıo Gormen kezdesti. Sonymen qatar, Qazaqstan men AQSh strategııalyq mańyzdy mıneraldar salasyndaǵy ózara túsinistik týraly memorandýmǵa qol qoıdy. Prezıdent IT-startaptardyń negizin qalaýshylarmen áńgimelesip, AQSh Kongresiniń Ókilder palatasynyń múshelerimen kezdesý ótkizdi.
Anadolu: Qazaqstan mal eksportyndaǵy shekteýdi uzartty
Qazaqstan Aýyl sharýashylyǵy mınıstrligi 2025 jylǵy 4 qarashada el aýmaǵynan tiri qoı, eshki jáne buqalardy eksporttaýǵa qatysty jańa buıryqqa qol qoıdy.Bul týraly túrkııalyq Anadolu agenttigi habarlady.
Qujatqa sáıkes, 2026 jylǵy 30 sáýirge deıin Qazaqstannan úshinshi elder men Eýrazııalyq ekonomıkalyq odaq elderine 4 aıdan asqan 120 myń toqty men serkeni ǵana shyǵarýǵa ruqsat etiledi. Kvotalardy bólý avtomatty túrde portal arqyly eksport lıtsenzııasyn bergen kezde júzege asyrylady.
Eksportqa shyǵarylatyn janýarlar úsh aıdan kem emes merzimde karantınge qoıylmas buryn ıdentıfıkatsııalyq bazaǵa engizilýi tıis. Jańa buıryq 2025 jylǵy 5 qarashadan bastap kúshine endi. Buǵan deıingi 2025 jylǵy 10 mamyrda engizilgen kvotalar men 26 sáýirdegi buıryq óz kúshin joǵaltty.
Report: Qazaqstan men Belarýs birqatar salada yntymaqtastyq týraly jol kartasyna qol qoıdy
Qazaqstan men Belarýs 2026–2028 jyldarǵa ónerkásiptik kooperatsııa, saýda-ekonomıkalyq, ǵylymı-tehnıkalyq jáne mádenı yntymaqtastyqqa qatysty birneshe ekijaqty qujatqa, sonyń ishinde jol kartalaryna qol qoıdy. Bul týraly Report agenttigi habarlady
Rásim Astanada eki eldiń premer-mınıstrleri – Aleksandr Týrchın men Oljas Bektenovtiń qatysýymen ótti, dep habarlaıdy Report agenttigi.
Aleksandr Týrchın eki el arasyndaǵy saýda kólemi shamamen 1 mlrd dollar ekenin atap ótti. Alaıda ony ári qaraı arttyrýǵa múmkindik bar. Kelissózde saýda-ekonomıkalyq baılanystardy nyǵaıtýǵa erekshe nazar aýdarylyp, basty basymdyq – ónerkásip salasyndaǵy, ásirese mashına jasaý salasyndaǵy yntymaqtastyq boldy.
Oljas Bektenov jalpy 15 birlesken jobanyń baryn, onyń 12-si sátti iske asqanyn, ınvestıtsııa kólemi 200 mln dollardan asatynyn jetkizdi. Qalǵan úsh joba ázirleý nemese iske asyrý satysynda. Bektenovtiń sózinshe, Qazaqstan Úkimeti saýda-ekonomıkalyq jáne basqa da qatynastardy damytýǵa bar kúshin salýǵa daıyn.
TASS: Qazaqstan men Serbııa arasynda tikeleı áýe reısi ashyldy
Qazaqstan men Serbııa astanalary – Astana men Belgrad arasynda tikeleı áýe qatynasy iske qosyldy. Bul aqparatty reseılik TASS agenttigi jazdy.
Reıs aptasyna eki ret – dúısenbi jáne beısenbi kúnderi SCAT áýe kompanııasy arqyly Boeing 737 ushaqtarymen júzege asady. Ushý ýaqyty – 5 saǵat 40 mınýt. Birinshi reıste 92 jolaýshy ushqan.
Qazaqstannyń kólik vıtse-mınıstri Talǵat Lastaevtyń aıtýynsha, jańa marshrýt eki el arasyndaǵy iskerlik, týrıstik jáne mádenı baılanystardy nyǵaıtýǵa múmkindik beredi.
Tikeleı reıs ashý týraly kelisim 2024 jyly Qazaqstan Prezıdenti Qasym-Jomart Toqaevtyń Serbııaǵa saparynda jasalǵan.