Álemdik BAQ-ta: Toqaevtyń maqalasy, Qazaqstan «qara tizimnen» shyqty
Mamyrdyń sońǵy aptasynda halyqaralyq basylymdar elimiz týraly kóp materıal taratty. Ásirese, álem nazary Memleket basshysy Qasym-Jomart Toqaevtyń Euronews-ta jarııalanǵan maqalasyn jarysa bólisti. Budan bólek osy aptada Eýropalyq komıssııa Qazaqstannan EO elderine ushýǵa qoıylǵan barlyq shekteýdi alyp tastaǵany, sondaı-aq elimizde óńdeý ónerkásibin avtomattandyrý joldary qarastyrylǵanyn habarlady. Osy týraly tolyǵyraq jáne budan basqa eń mańyzdy maqalalarǵa Kazinform tilshisi sholý jasady.
Euronews: Orta derjavalar kópjaqty kózqaras ıdeıasyna berik
Osy aptada Euronews Qazaqstan Prezıdenti Qasym-Jomart Toqaevtyń orta derjavalardyń róli týraly maqalasyn jarııalady. Halyqaralyq basylym Memleket basshysynyń maqalasyn tolyq usynǵan.
Qazaqstan sııaqty elder jańa kúshpen alǵa shyǵyp, qatysýshy retinde ǵana emes, sonymen qatar jahandyq arenadaǵy jaýapty oıynshy retindegi óz rólin kórsete bilýi kerek. Tótenshe geosaıası týrbýlenttilik pen turaqty qaqtyǵystarǵa toly búgingi álemde kópjaqty sheshimder óte mańyzdy. Eýropa, Taıaý Shyǵys jáne Afrıkadaǵy soǵystar júzdegen myń adamnyń ómirin qıyp, klımattyń ózgerýi mıllıondaǵan adamdy ash, jalańash jáne baspanasyz qaldyryp jatyr. Bul qaqtyǵystar sheshilmeıtindeı bolyp kórinedi, – dep bólisti Euronews.
Anadolu Agensy: Qazaqstan sııaqty elder jahandyq arenada jaýapty oıynshy retinde rólin kórsetýi tıis – Toqaev
Prezıdenttiń maqalasy Euronews-te jarııalanǵany týraly Anadolu Agensy de habarlady.
Agenttiktiń málimetinshe, Toqaev Eýropadaǵy, Taıaý Shyǵystaǵy jáne Afrıkadaǵy soǵystar júzdegen myń adamnyń ómirin qııatynyn, al klımattyń ózgerýi mıllıondaǵan adamdardy ash, jalańash jáne baspanasyz qaldyratynyn atap ótti.
Bul qaqtyǵystar sheshilmeıtindeı bolyp kórinedi. Osy jahandyq alaýyzdyq aıasynda dástúrli derjavalar – álemniń ekonomıkalyq jáne saıası alpaýyttarynyń birigip jumys isteý múmkindigi azaıyp barady, – dep Qazaqstan Prezıdentiniń maqalasynan úzindi keltirdi basylym.
The Times of Central Asia: Qazaqstan men EO aýyl sharýashylyǵy ónimderiniń saýdasyn ulǵaıtýǵa umtylýda
2023 jyly Qazaqstan EO elderine 650 myń tonna bıdaı, sondaı-aq zyǵyr, raps tuqymdary men óńdelgen dándi daqyldardy eksporttady. Bul týraly The Times of Central Asia Qazaqstannyń aýyl sharýashylyǵy mınıstri Aıdarbek Saparov pen Eýropalyq odaqtyń aýyl sharýashylyǵy jónindegi komıssary ıAnýsh Voıtsehovskııdiń kelissózine silteme jasap habarlady.
Qazaqstandyq óndirýshilerdiń EO-ǵa mal sharýashylyǵy ónimderin eksporttaýǵa áli lıtsenzııasy bolmasa da, qazaqstandyq balyq Eýropadaǵy satyp alýshylar arasynda úlken suranysqa ıe. Qazaqstannyń 70 balyq óńdeý kásipornynyń 18-i óz ónimderin Eýroodaq elderine eksporttaý quqyǵyna ıe boldy. 2023 jyly Qazaqstannyń balyq ónimderiniń eksporty quny 85 mıllıon dollar bolatyn 25 myń tonnany qurady. Shamamen 11 myń tonna EO elderine, sonyń ishinde Germanııa, Nıderland, Danııa jáne Lıtvaǵa jalpy somasy 60 mıllıon dollarǵa eksporttaldy, – dep jazdy basylym.
Sentralasia.news: Qazaqstanda óńdeý ónerkásibin avtomattandyrý máselesi talqylandy
Qazaqstan Úkimeti respýblıkanyń óńdeý ónerkásibin damytý máselelerin talqylady. Osy sektordaǵy óndiris kólemi aǵymdaǵy jyldyń qańtar-sáýir aılarynda 5,2%-ǵa ulǵaıyp, 7,1 trıllıon teńgege jetti jáne 5,6 mıllıard dollar bolatyn óńdeý ónerkásibi taýarlary eksporttaldy. Negizgi kapıtalǵa salynǵan ınvestıtsııalar 403,2 mlrd teńgeni qurap, 19,9%-ǵa ósti, dep jazady Sentralasia.news premer-mınıstrdiń baspasóz qyzmetine silteme jasap.
Basylymnyń málimetinshe, eń úlken úlesti metallýrgııa ónerkásibi, mashına jasaý jáne azyq-túlik óndirisi alady. Premer-mınıstr óńdeý sektory kez kelgen memlekettiń ónerkásibin tabysty damytýdyń negizi ekenin, sondyqtan el ekonomıkasynyń qurylymyndaǵy óńdeý úlesin ulǵaıtý qajettigin atap ótken.
Trend: Eýropalyq komıssııa Qazaqstannan EO elderine ushýǵa qoıylǵan barlyq shekteýdi alyp tastady
Mundaı sheshim Eýropalyq Odaqtyń (EO) 27 eliniń avıatsııalyq bılik ókilderiniń qatysýymen Eýropalyq komıssııanyń Ushý qaýipsizdigi komıteti otyrysynyń qorytyndysy boıynsha qabyldanǵan. Bul týraly ázerbaıjandyq Trend agenttigi QR Kólik mınıstrligine silteme jasap habarlady.
Komıtet otyrysynda kólik vıtse-mınıstri Talǵat Lastaev bastaǵan Qazaqstannyń avıatsııalyq bılik delegatsııasy eldegi ushý qaýipsizdigi jónindegi isterdiń aǵymdaǵy jaı-kúıi týraly tyńdady... Qazaqstandyq delegatsııa buryn anyqtalǵan eskertýlerdi joıý boıynsha qabyldanǵan is-qımyldardy usyndy, olardy Eýrokomıssııa oń baǵalady, – dep jazdy basylym.
Trend málimetinshe, EO-ǵa múshe 27 memleket qabyldaǵan komıtet otyrysynyń sheshimine sáıkes, ushý qaýipsizdigin qamtamasyz etýdegi eleýli progresti eskere otyryp, Qazaqstan men qazaqstandyq tasymaldaýshylardan Eýropalyq Odaq elderine ushýǵa barlyq shekteý alynyp tastaldy.
