Álemdik BAQ Mıhaıl Shaıdorovtyń Olımpıadadaǵy jeńisi týraly ne jazdy
ASTANA.KAZINFORM - 21 jastaǵy almatylyq mánerlep syrǵanaýshy Mıhaıl Shaıdorov Olımpıadada úzdik óner kórsetip, Qazaqstanǵa tarıhtaǵy alǵashqy altyn medaldi syılady. Sheteldik basylymdar jas sportshynyń tehnıkalyq sheberligi men ónerin joǵary baǵalap, bul jeńisti Qazaqstan sporty úshin tarıhı nátıje dep baǵalady.
Kazinform agenttigi álemdik medıada jarııalanǵan materıaldarǵa sholý jasady.
The Guardian: Ilıa Malının eki ret qulady, al Qazaqstandyq Mıhaıl Shaıdorov bárin tańǵaldyrdy
Sońǵy eki jyl boıy erler arasyndaǵy mánerlep syrǵanaýda Ilıa Malınınniń jeńiske jetetini sózsiz dep esepteletin. Biraq jumanyń keshinde Mılanda kútpegen jaǵdaı boldy – Mıhaıl Shaıdorov bárin tańǵaldyrdy.
21 jastaǵy qazaqstandyq sportshy osy maýsymdaǵy eń úzdik óner kórsetti. Qysqa baǵdarlamadan keıin besinshi orynda turǵan ol 291,58 upaı jınap, Olımpıadada altyn medal aldy. Al jarystyń eń myqty úmitkerleri bir-birlep óz oryndaryn joǵaltty, al Shaıdorov sabyrly qımyldap, erkin baǵdarlamasyn bes tórttik sekirýmen (tórttik lýtts, týlýp jáne flıp) dál oryndap, chempıon sııaqty senimdi ári turaqty óner kórsetti. Upaılary kórsetilgende, ol kórermender sııaqty tańqalǵan kúıde boldy.
Ilıa Malının eki qate jasap, birinshi orynnan segizinshi orynǵa tústi.
– Men bárin búldirdim. Buǵan sený qıyn, – dedi ol.
Biraq bul jeńis Mıhaıl Shaıdorovqa tıesili boldy. Onyń taza baǵdarlamasy Olımpıadadaǵy jeńis tek talantqa emes, shydamdylyq pen turaqtylyqqa da baılanysty ekenin kórsetti.
BBC Sport: Shaıdorov altyn medaldi jeńdi, Ilııa Malının qulady
Ilııa Malının Mılan-Kortınanyń muz aıdynyna «tórttik sekirýdiń sheberi» retinde kelgen edi. Biraq jarystan basyn shaıqap, muzdan ketti. Onyń qulaýynan keıingi tynyshtyqta Mıhaıl Shaıdorov óz esimin tarıhqa jazdy.
Erler arasyndaǵy erkin baǵdarlamada fınalǵa shyqqan alty sportshynyń beseýi qulaǵan kezde, Shaıdorov jalǵyz aıaqta qaldy. Basqalar qınalǵanda, ol sabyrly bolyp, tórttik sekirýlerin dál oryndap, Olımpıadanyń altyn medalin jeńip aldy.
Flashscore: Qazaqstandyq Shaıdorov altyn medaldi jeńdi, al basty úmitker Malının qulady
21 jastaǵy Mıhaıl Shaıdorov Mılan-Kortınanyń Olımpıadasynda erler arasyndaǵy mánerlep syrǵanaýdan sensatsııalyq jeńiske jetti. Sol ýaqytta basty úmitker Ilııa Malının birneshe ret qulap, kórermenderdi tańǵaldyrdy.
Grand Pinnacle Tribune: Mıhaıl Shaıdorov bárin tańǵaldyrdy – mánerlep syrǵanaýdan altyn medal
2026 jylǵy Olımpıadadaǵy erler arasyndaǵy mánerlep syrǵanaýdyń fınaly burynǵy chempıondy anyqtaý úshin ótkizilip jatty. Alaıda onyń ornyna jańa chempıon paıda boldy. Qysqa baǵdarlamadan keıin altynshy orynda turǵan 21 jastaǵy Mıhaıl Shaıdorov minsiz óner kórsetip, bes tórttik sekirýin oryndady. Osylaısha ol Qazaqstanǵa 32 jyldan keıin alǵashqy qysqy Olımpıada altyn medalin syılady.
The New York Times: Mıhaıl Shaıdorov ómirlik óner kórsetip, álemdi altynmen tańǵaldyrdy
Mánerlep syrǵanaýshy Mıhaıl Shaıdorov qolyn kóterip podıýmǵa shyqty. Onyń qyzyl shashy jelbirep, tistegi breketteri jaryqta jarqyrady. 21 jastaǵy Shaıdorov basty úmitker Ilııa Malınındi artqa qaldyryp, Qazaqstanǵa osy Olımpıadadan alǵashqy medaldi jáne 32 jyldan keıingi alǵashqy altyn medaldi syılady.
Barron’s: «Múmkin emes nárse joq»: Shaıdorov basty úmitker Malınındi artta qaldyrdy
Qysqa baǵdarlamadan keıin besinshi orynda turǵan Mıhaıl Shaıdorov erkin baǵdarlamasynda keremet óner kórsetti. Ol bes tórttik sekirý jasap, sırek kezdesetin kombınatsııa – úshtik aksel, Eıler jáne tórttik Salhovty oryndady. Al basty úmitker Ilııa Malının eki ret qulap, segizinshi orynǵa tústi.
– Bul men úshin óte mańyzdy sát. Ómirimdegi eń úzdik ónerimdi kórsete aldym. Olımpıada chempıony atanǵanyma áli de sene almaı otyrmyn», – dedi Shaıdorov.
Kyodo News: Olımpıada: Kagııama – ekinshi, Sato – úshinshi oryn, Shaıdorov mánerlep syrǵanaýda álemdi tańǵaldyrdy
Qysqa baǵdarlamadan keıin besinshi orynda turǵan Mıhaıl Shaıdorov óziniń mansabyndaǵy eń úzdik kórsetkishin kórsetti – erkin baǵdarlamasynda 198,64 upaı jınap, jalpy esepte 291,58 upaıǵa jetti. Osylaısha ol Qazaqstannyń mánerlep syrǵanaýdan tarıhtaǵy alǵashqy Olımpıada chempıony atandy.
The Economic Times: Mıhaıl Shaıdorov – Qazaqstannyń 32 jyldaǵy alǵashqy qysqy Olımpıada chempıony
21 jastaǵy almatylyq Mıhaıl Shaıdorov mánerlep syrǵanaýdy 2010 jyly bastaǵan. Ol Almaty men Sochı qalalarynda 1994 jylǵy Olımpıada chempıony Alekseı Ýrmanovtyń jetekshiligimen jattyǵady. Tehnıkalyq jańashyl sportshy 2024 jylǵy Frantsııa Gran-prıinde úshtik aksel – tórttik týlýp kombınatsııasyn, al 2024 jylǵy ISU Gran-prı fınalynda úshtik aksel – Eıler – tórttik Salhov kombınatsııasyn alǵash oryndady.
Eki dúrkin Olımpıada chempıony ıÝdzýrý Hanıýdan shabyt alǵan Shaıdorovtyń jeńisi Qazaqstan úshin 32 jyldan keıingi alǵashqy qysqy Olımpıada altyn medali bolyp, el mánerlep syrǵanaýy tarıhynda tarıhı oqıǵaǵa aınaldy.
Budan buryn Prezıdent Mıhaıl Shaıdorovty II dárejeli «Barys» ordenimen marapattaǵanyn jazǵan edik.
Qazaqstan Ánurany araǵa 32 jyl salyp qysqy Olımpıada tórinde taǵy shyrqaldy.
Osylaısha Qazaqstan jalpy esepte 15-orynǵa kóterildi.