Álemdik áýen Bozjyrada áýeledi: tanymal pıanıstiń erekshe jobasy eldi tánti etti
AQTAÝ. KAZINFORM — Sahnada Ratovıch degen laqap atpen tanylǵan qazaqstandyq pıanıst ári kompozıtor Temirlan Beısenbaı men trevel-bloger Ádilet Rahmetolla ekeýi jańa beınejobany usyndy. Túsirilim eldiń eń kórikti tabıǵı nysandarynyń biri — Bozjyra shatqalynda ótken. Bul týraly Kazakh Tourism ulttyq kompanııasy málimdedi.
Ratovıch Mańǵystaý oblysyndaǵy Bozjyranyń áserli kórinisteri aıasynda «Interstellar» fılmindegi kompozıtor Hans Tsımmerdiń «Cornfield Chase» tanymal týyndysyn oryndady. Shyǵarmashylyq bastama Qazaqstan tabıǵatynyń sulýlyǵyn nasıhattaýǵa, el ishinde saıahattaýǵa shaqyrýǵa jáne qorshaǵan ortaǵa qurmetpen qaraý mádenıetin qalyptastyrýǵa baǵyttalǵan.
Jobaǵa Kazakh Tourism ulttyq kompanııasy, Mańǵystaý oblysynyń týrızm basqarmasy jáne Rixos Water World Aktau qonaq úıi uıymdastyrýshylyq ári logıstıkalyq qoldaý kórsetken.
— Búginde Qazaqstannyń týrıstik nysandary shyǵarmashylyq jobalar túsiriletin alańǵa aınalyp keledi. Qyrkúıek aıynda Bozjyra shatqalynda Dımash Qudaıbergen men Qytaıdyń eń iri telearnalarynyń biri Hunan TV jobasy túsirildi. Mundaı bastamalar tabıǵı jáne mádenı murany ilgeriletýge yqpal etip, kópshilikti Qazaqstanmen keńirek tanysýǵa shabyttandyrady, — dep atap ótti «Kazakh Tourism» UK» AQ Basqarma tóraǵasynyń m. a. Danıel Serjanuly.
Bul Ratovıchtiń týrıstik oryndarda túsirgen alǵashqy jobasy emes. 2022 jyly mýzykant óz kompozıtsııasy arqyly Shyǵys Qazaqstandaǵy Katonqaraǵaı ulttyq parkin kópshilikke tanystyrdy.
Bozjyra — Qazaqstannyń tanymal jáne áserli tabıǵı oryndarynyń biri. Biregeı relef pen jartas pishinderiniń arqasynda shatqaldy marstyń kórinisterine jıi uqsatady. Ústirtiń kınematografııalyq peızajdary saıahatshylardyń ǵana emes, shyǵarmashylyq sala ókilderiniń de nazaryn aýdarady.
Aıta keteıik, sheteldik ınvestor Bozjyra shatqalyna qonaqúı salýǵa nıetti.