Álemdik áýe kompanııalarynyń qaısysy Taıaý Shyǵysqa ushýdy toqtatty
ASTANA. KAZINFORM — Dýbaıda ornalasqan Emirates áýe kompanııasy Lıvan astanasyna reısterdi toqtatýdy jyldyń sońyna deıin, sondaı-aq Irak astanasyna — qarashanyń sońyna deıin uzartty. Beırýtke Dýbaı arqyly tranzıtpen baratyn jolaýshylar reıske ushý pýnktinen otyrmaıdy, dep habarlaıdy Kazinform menshikti tilshisi.
Ámirlikter áýe kompanııasynyń atap ótýinshe, ol aımaqtaǵy jaǵdaıdy jiti baqylaýdy jalǵastyryp jatyr jáne belgilengen oryndarda jergilikti avıatsııa bıligimen baılanysta.
Áýe kompanııasy veb-saıtyndaǵy málimdemesinde «Emirates-tiń Beırýtke jáne odan ushatyn reısteri 2024 jyldyń 31 jeltoqsanyna deıin toqtatylǵany» habarlandy.
Emirates-tiń Baǵdadqa jáne odan shyǵatyn reısteri de 2024 jyldyń 30 qarashasyna deıin toqtatyldy.
Áýe kompanııasy sonymen qatar Dýbaı arqyly Beırýt pen Baǵdadqa sapar shegetin tranzıttik jolaýshylarǵa kelesi eskertýge deıin olardyń jóneltiletin jerinde otyrǵyzýǵa ruqsat etilmeıtinin atap ótti.
Kompanııa jolaýshylarǵa saparlarynyń balama nusqalaryn zertteý úshin tikeleı brondaý agentterimen baılanysýǵa nemese áýe kompanııasyna habarlasýǵa keńes berdi.
— Osy arada, Emirates seriktesi Flydubai loýkosteri Baǵdadqa ushýyn jalǵastyryp jatyr, — delingen habarlamada.
Eske sala ketsek, Irannyń Izraılge jasaǵan zymyran shabýyldaryna baılanysty Taıaý Shyǵystaǵy negizgi áýe keńistigi jabylǵannan keıin halyqaralyq áýe kompanııalary aıtarlyqtaı irkiliske tap boldy. Birqatar áýe kompanııalary ushaqtarynyń ushýyn ózgertti nemese Taıaý Shyǵystyń keıbir astanalaryna reısterin tolyǵymen toqtatty.
Taǵy qandaı áýe kompanııalary reısterdi toqtatty?
Buǵan deıin Qatar Airways Irak, Iran jáne Lıvanǵa reısterdi ýaqytsha toqtatqan bolatyn. Iordanııaǵa reıster tek kúndizgi ýaqytta oryndalyp jatyr.
Turkish Airlines jáne Pegasus áýe kompanııalary jaýap soqqylarynan qaýiptenip, Iranǵa ushatyn barlyq reısterdi toqtatty.
KLM Tel-Avıvke ushýyn toqtatty. Transavia Lıvanǵa 3 qarashaǵa deıin, al Izraılge 2025 jyldyń naýryz aıynyń sońyna deıin reısterdi toqtatty.
Air France Beırýt pen Tel-Avıvke reısterdi toqtatty.
Lufthansa Group Tel-Avıvke 31 qazanǵa deıin, Tegeranǵa 26 qazanǵa deıin jáne Beırýtke 30 qarashaǵa deıin reısterdi toqtatty.
Wizz Air 2025 jyldyń qańtaryna deıin Tel-Avıvke jáne odan shyǵatyn reısterdi toqtatty.
Buǵan deıin habarlaǵanymyzdaı, Halyqaralyq qylmystyq sot Netanıahý men Galantty qamaýǵa alýǵa order berdi.
