Álemdik arenadaǵy ustanymdy nyǵaıtý: Eýroodaq kóshbasshylary jańa jyldyq quttyqtaýlarynda ne aıtty
ASTANA. KAZINFORM – Jańa jyl qarsańyndaǵy dástúr boıynsha Eýropalyq odaqtyń kóshbasshylary 2026 jyldy qarsy alar aldynda óz halyqtaryna arnap úndeý jasady, dep habarlaıdy Kazinform agenttiginiń menshikti tilshisi.
Eýropalyq komıssııanyń prezıdenti Ýrsýla fon der Lıaıen 2026 jańa jylyna qadam basqan EO turǵyndary onyń ózi jáne komandasy Eýropany nyǵaıtý jolynda tynymsyz eńbek ete beretinine senim arta alatynyn atap ótti.
— Buryn-sońdy bolmaǵan jyldamdyqpen ózgerip jatqan álemde básekege qabilettilik pen ınnovatsııa salasyndaǵy Eýropanyń biregeı áleýetin tolyq jumyldyrý arqyly ishki ustanymymyzdy nyǵaıtý.
— Jańa seriktestikter qurý jáne dostarymyz ben odaqtastarymyz qorǵaýdy kútetin qundylyqtardy ashyqtyq, adaldyq jáne demokratııany qorǵaý arqyly álemdik arenadaǵy ornymyzdy kúsheıtý.
— 2026 jyly barshańyzǵa shyn júrekten beıbit ómir tileımin. Ýkraına úshin ádil ári berik beıbitshilik ornasyn. Biz muny olarǵa jáne búkil álemdegi barlyq adamdarǵa tileımiz, — delingen Ýrsýla fon der Lıaıenniń quttyqtaýynda.
Eýropalyq keńes tóraǵasy Antonıý Koshta da eýropalyqtardy Jańa jylmen quttyqtap, alda synaqtar kútip turǵanyn, alaıda olardy birge eńserýge kúsh bar ekenin aıtty.
— Beıbitshilik pen qaýipsizdikke negizdelgen, álemdik deńgeıde básekege qabiletti ári ishki jaǵynan birtutas, azamattarymyzǵa ortaq órkendeý ákeletin Eýropany birge quraıyq. Kelińizder, anaǵurlym adamgershiligi mol ári beıbit álem qurý jolynda eńbek eteıik, — dedi Koshta.
Frantsııa prezıdenti Emmanıýel Makron beıneúndeýinde frantsýzdardy biriktiretin sebepter kún ótken saıyn olardy bólýi múmkin jaıttardan áldeqaıda kúsheıip kele jatqanyn atap ótti.
— Men ultymyzǵa úsh nárse tileımin: birlik, kúsh pen táýelsizdik, úmit. 2026 jyl qutty da baqytty bolsyn! — dedi Makron.
Germanııa kantsleri Frıdrıh Merts 2026 jylǵa arnalǵan jańa jyldyq quttyqtaýynda eliniń jetistikterin atap ótti.
— Germanııa sońǵy segiz onjyldyqqa jýyq ýaqyt ishinde orasan kóp jetistikke jetti. Biz erkin ári teń quqyqta ómir súrip jatqan elmiz. Biz bir-birimizge qamqorlyq jasaımyz. Muny osyndaı jaqsy, ómir súrýge qolaıly jáne súıikti eldi saqtap qalý jolyndaǵy ortaq jaýapkershiligimiz retinde qabyldaıyq. Germanııa — uly el. 2026 jyly da senim men óz kúshimizge degen ılanymǵa súıeneıik, — dedi GFR kantsleri.
Eske sala keteıik, artta qalǵan 2025 jyl Eýropalyq odaq pen Qazaqstan arasyndaǵy qarym-qatynastarda mańyzdy saıası oqıǵalarǵa toly boldy. Olardyń qatarynda EO–Ortalyq Azııa alǵashqy sammıti, Eýropalyq keńes tóraǵasy Antonıý Koshtanyń Astanaǵa sapary jáne Keńeıtilgen áriptestik pen yntymaqtastyq týraly kelisimge qol qoıylǵanyna 10 jyl tolýy bar.