«Álemdik jelide zańsyz kontentterdi joıýǵa ınternet paıdalanýshylardyń ózderi atsalysýlary kerek» - A. Chernıavskaıa
ALMATY. QazAqparat- «Búginde ómirdi ǵalamtorsyz kóz aldyńa elestetý qıyn. Biraq ol alaıaqtar men basqa da qylmyskerlerdiń mekenine aınaldy.
Endi olarmen tek quqyq qorǵaýshylar ǵana emes, qoǵamdyq uıymdar da kúresýleri kerek». Búgin ınternet jelilerindegi zańsyz kontentterdiń taralýy jáne óskeleń urpaqty zııandy aqparattardan qorǵaýǵa arnalǵan dóńgelek ústel barysynda Safekaznet jobasynyń jetekshisi Aleksandra Chernıavskaıa osylaı málim etti.
«Balalar pornografııasyn, ózine-ózi qol jumsaýdy, esirtkilerdi, ultshyldyqty, ekstremızmdi jáne lańkestikti nasıhattaý. Bular ǵalamtordaǵy qaýip-qaterlerdiń azǵana ǵana tizimi. Qazaqstan ınternet qaýymdastyǵynyń derekteri boıynsha 2013 jyly zııandy 612 habarlama anyqtalǵan. Olardyń 52,29% - qýdalaý, qorlaý sıpatynda bolyp kelse, 26,63% - násilshildik, ultshyldyq jáne ksenofobııalyq sıpatta, 15,03% - alaıaqtyq áreketter, al 6,2% - zańsyz kontentter (lańkestik, ósek-aıań, jeke ómirge qol suǵýshylyq) bolǵan», - dedi A. Chernıavskaıa.
Onyń aıtýynsha, álemdik jelide zańsyz kontenttermen kúresýge ınternet paıdalanýshylar da atsalysýlary kerek.
« Safekaznet-tiń telefon nómirine ǵalamtorda paıda bolǵan zańsyz saıttar týraly habarlaýǵa bolady. Al sarapshylar kontentterdiń mekenjaılaryn anyqtap, QR zańnamasyna sáıkestikterin belgileıdi. Qajet bolǵan jaǵdaıda alastatý úshin tıisti sharalar qoldanady» - dedi ol.
Safekaznet jobasynyń jetekshisi aıtqandaı, 2013 jyly QR ınternet qaýymdastyǵy Halyqaralyq INHOPE uıymymen jumys isteý aıasynda zorlyq-zombylyqty, balalar pornografııasyn nasıhattaıtyn saıttar týraly 467 habarlama alǵan. Keıin bul saıttar joıyldy.
