Álemdik jáne dástúrli dinder kóshbasshylary Sezi hatshylyǵynyń 12-shi otyrysy ótedi

ASTANA. 16 qyrkúıek. QazAqparat - Álemdik jáne dástúrli dinder kóshbasshylary Seziniń 10 jyldyǵyna arnalǵan birqatar sharalar ótedi. Bul týraly QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda Parlament Senatynyń baspasóz hatshysy Talǵat Jumaǵulov málim etti.

«25 qyrkúıekte Astanadaǵy Táýelsizdik saraıynda Álemdik jáne dástúrli dinder kóshbasshylary Sezi hatshylyǵynyń 12-shi otyrysy, sondaı-aq «Órkenıetter únqatysýyndaǵy Astana dinaralyq forýmynyń róli» taqyryby boıynsha ǵylymı tájirıbelik konferentsııa ótedi», - dedi baspasóz hatshysy.

Atap aıtqanda, bul sharalar QR Prezıdenti Nursultan Nazarbaev bastamasymen 2003 jylǵy 23-24 qyrkúıekte shaqyrylǵan tuńǵysh Álemdik jáne dástúrli dinder kóshbasshylary Seziniń 10 jyldyǵyna arnalyp otyr.

Hatshylyqtyń 12-shi otyrysy barysynda byltyr mamyrda ótken IV Álemdik jáne dástúrli dinder kóshbasshylary Seziniń qorytyndylary boıynsha pikir almasýlar ótedi.

Qatysýshylar sonymen qatar, 2015 jylǵa josparlanǵan 5-shi sezdiń tujyrymdamalyq jáne uıymdastyrý máselelerin talqylaıdy. Otyrysqa Hatshylyq basshysy - QR Parlamenti Senatynyń tóraǵasy Qaırat Mámı tóraǵalyq etip, hatshylyq músheleri, ıaǵnı Álemdik jáne dástúrli dinderdiń ókilderi qatysatyn bolady.

«Órkenıetter únqatysýyndaǵy Astana dinaralyq forýmynyń» róli taqyrybyndaǵy halyqaralyq ǵylymı tájirıbelik konferentsııa Memleket basshysynyń konfessııaaralyq forýmdy ótkizý týraly ıdeıasynyń tarıhı mańyzyn ǵylymı turǵyda zerdeleýge yqpal etýi tıis. Sharaǵa Álemdik jáne dástúrli dinder ókilderi, qazaqstandyq, sheteldik qoǵamdyq saıası qaıratkerler, belgili ǵalymdar shaqyrylyp otyr.