«Álemdik týrızm arýy» baıqaýyna baratyn qazaq qyzy anyqtalmaq
ASTANA. QazAqparat - Keler jyly Malaızııada ótetin «Álemdik týrızm arýy» baıqaýyna baratyn qazaq qyzy aldaǵy kúnderi anyqtalady, dep habarlady www.24.kz.
Ol búginge deıingi irikteý saıystarynan súrinbeı ótken bes sulýdyń biri atanbaq. Uıymdastyrýshylar baıqaýdyń basty erekshelikterin áńgimelep, negizgi talaptaryna toqtaldy. «Jalpy arýlar elimizdiń týrıstik áleýetin tanystyryp, úsh tildi meńgerýi tıis. Sondaı-aq tanym deńgeıi jaǵynan ózgelerden ozyq bolýy mindet», - deıdi olar.
Aıta keteıik, «Álemdik týrızm arýy» baıqaýy keler jyldyń aqpanynda ótedi. Osy dúnıejúzilik saıys arqyly ulttyq mádenıetimiz ben týrıstik oryndarymyz keńinen nasıhattalmaq.
«Qazir bes qyzǵa kózimiz túsýde. Osy jeksenbi kúni belgili bolady. Bul baıqaý 16 aqpan kúni bolady. Malaızııa memleketinde Kýala-Lýmpýr qalasynda. Qazir daıyndyq ústindemiz», - dedi uıymdastyrý komıtetiniń múshesi Rımma Tájibaeva.
