Álemdik taýar naryqtarynda munaıdyń baǵasy ósti
ASTANA. QazAqparat - Búgin álemdik munaı naryqtarynda munaı baǵasynyń ósýi baıqaldy. Londonnyń qurlyqaralyq bırjasynda fıýcherstik mámileler sessııasynyń sońynda Brent qospasyn jetkizýge kelisimsharttar quny barreline 0,21 dollarǵa artyp, 90,26 dollarǵa jetti.
ITAR-TASS-tyń habarlaýynsha, Nıý-Iork taýar bırjasynda saýda áli jalǵasýda, munda da shıkizat baǵasynyń ósýi baıqalýda. Tehastyq ashyq tústi munaıdyń (WTI) baǵa belgilenimi barreline 85,97 dollardy qurap, kúni boıy baǵa belgilenimi 0,67 dollarǵa kóterildi.
Kúni boıy Brent markaly munaı baǵasy barreline 90 dollardan tómen tústi. «Biz Brent jáne West Texas Intermediate baǵalaryn qoldaýdyń syndarly deńgeıine jaqyndadyq, dep oılaımyn. Budan buryn baǵa 85 dollar bolǵanda oǵan OPEK aralasqan bolatyn. Qazir de sondaı sharalar qabyldanýy múmkin dep aıta almaımyn, olar tutastaı alǵanda munaımen jabdyqtaý jónindegi jaǵdaıdy baǵalaýy tıis», - dedi CMC Markets aǵa taldamashysy Rık Spýner.
Keıinirek Brent munaıynyń qarashadaǵy jetkiziliminiń baǵasy barreline 90 dollar deńgeıine qaıtyp oraldy.
