Álemdik standarttarǵa saı alǵashqy túrme Qaraǵandy oblysynda salynady
ASTANA. 13 qańtar. QazAqparat - Qazaqstanda álemdik standarttarǵa saı túrme alǵash ret aǵymdaǵy jyly Qaraǵandy oblysynda salynbaq. Bul týraly búgin Parlament Májilisindegi Úkimet saǵatynda málim boldy.
Jıyn barysynda baıandama jasaǵan Іshki ister mınıstri Qalmuhanbet Qasymov túzeý mekemelerindegi reformalarǵa toqtala kele, olardyń negizgi baǵyty sottalǵandardy ujymdyq ustaý jaǵdaıynan tyıyp, toptap emes jeke kameralarǵa bólip ustaýǵa kóshýge baǵyttalǵanyn atap ótti. Onyń sózine qaraǵanda, qazirgi ýaqytta elimizde bundaı 8 mekeme ǵana bar. Al 37 myń adamdy osy tártippen ustaýǵa kóshý úshin keminde 25 myńǵa tarta mekeme kerek. «Bólek-bólek kameralardy ustaýǵa kóshý kóp qarajatty qajet etedi. Sondyqtan, qoldanystaǵy mekemelerdi qalpyna keltirý óz aldyna, ustaý jaǵdaılary álemdik standarttarǵa saı keletin jańa kolonııalar men tergeý ızolıatorlaryn salý qajettigi týyndap otyr. Muny memlekettiń kúshimen ǵana sheshe almaımyz. Soǵan oraı, biz memlekettik-jekemenshik áriptestik ustanymdary negizinde alǵashqy kolonııany Qaraǵandy oblysynda turǵyzbaqpyz. Buǵan ákimshilik jer telimin berdi, Úkimet bıylǵy jylǵa jobany jergilikti jerge bekitý úshin arnaıy qarajat bóldi», - deıdi mınıstr Q. Qasymov.
