Álemdik standartqa saı otandyq ónim
Búginde álemdik standartqa saı dep tanylǵan otandyq ónim elimizde tanymaldyqqa ıe bola bastady. QazAqparat tilshisine bergen suhbatynda «Astels» JShS-nyń atqarýshy dırektory Qaıdar Muǵal óndiretin ónimderiniń erekshelikterine toqtalyp, aldaǵy josparlarymen bólisti.
«2015 jyly biz Ońtústik Koreıa memleketindegi seriktesterimizben baılanys ornatyp, olardan vakýýmdyq ajyratqysh shyǵarýdyń qyr-syryn úırendik. Qazirgi tańda kompanııamyzdyń óz isiniń has sheberleri eńbek etip jatyr. Olardyń basym bóligi Ońtústik Koreıaǵa baryp, kásibı biliktilikterin jetildirip keldi. Taıaýda taǵy 2 qyzmetkerimizdi shetelge oqýǵa attandyraıyn dep otyrmyz. Kompanııa Qazaqstan naryǵyna engen ýaqyttan beri kerneýi 10 kV-tyq AVL-1200 atty qazaq brendi bolyp tabylatyn vakkýmdyq ajyratqyshtardy shyǵaryp keledi. Osy ýaqytqa deıin naryqqa 400-den astam vakkýmdyq ajyratqysh shyǵaryldy. Dál osy ajyratqyshtyń sapasy óziniń álemge áıgili «Siemens», «ABB», «Shnyider» sekildi balamalarymen birdeı. Buǵan qosa ol barlyq halyqaralyq «IEC» standarttaryna saı keledi. Búgingi tańda túrli kásiporyndar men óndiris oshaqtary, qurylys kompanııalary men transformatorlyq qosalqy stansalar, óńirlik elektr jelilik kompanııalary, munaı jáne gaz sektory syndy kóptegen mekemeler biz óndirip otyrǵan vakýýmdyq ajyratqyshtardyń negizgi tutynýshylary bolyp otyr. Bizdi otandyq ónimge degen suranys qatty qýantady. Sebebi qarjy syrtqa ketpeıdi. Óz elimizde, óz jerimizde aınalady. Biz óndirýshi, olar tutynýshy retinde otandyq ekonomıkanyń qaryshtaýyna úles qosyp kelemiz. Bul baǵyttaǵy jumys jalǵasa beredi», - dedi atqarýshy dırektor.
Onyń aıtýynsha, kompanııa shyǵaratyn ónimniń basqa sheteldik vakýýmdyq ajyratqyshtardan birneshe basymdyǵy bar. Birinshiden, AVL-1200 vakýýmdyq ajyratqyshynyń qosalqy bólshekteri Koreıadan ákelinip, elimizde qurastyrylady. Al basqa kompanııalar shyǵaratyn ónimder daıyn kúıinde tolyǵymen shetelden tasymaldanady. Sol sebepti olardyń quny qymbat bolady. Ekinshiden, AVL-1200 vakýýmdyq ajyratqyshynyń tolymdaýshylary QR energetıkalyq zańyna saı jasalady. Al shetelde jınaqtalǵan vakýýmdyq ajyratqyshtar bul zańnamaǵa saı kelmeýi múmkin.
Buǵan qosa, tutynýshy ózimizde óndiriletin vakýýmdyq ajyratqyshtardy qosymsha bólshektermen tolymdaı alady, bul tasymaldaýǵa jumsalatyn qarajat pen ýaqytty únemdeýdiń tıimdi ári taptyrmas tásili bolyp tabylady.
«Vakýýmdyq ajyratqyshtar qazirgi tańda energetıka salasynda joǵary voltti kommýtatsıondy apparatýra retinde óte mańyzdy ról atqarady. Osyndaı otandyq ónim óndirý arqyly biz elimizdiń energetıka salasyn damytýǵa, halyqty jumyspen qamtýǵa jáne bıýdjetke tólenetin salyq kólemin eseleýge qomaqty úles qosatynymyzǵa senimdimiz. Keleshekte jınaqtaýdyń qazirgiden de joǵary dárejesine jete otyryp, usaq toraptyq bólshekterdi ózimiz óndirýdi josparlap qoıdyq. Qazaqstan Eýrazııalyq ekonomıkalyq odaqqa engennen beri otandyq ónimdi ótkizetin naryqtyń aıasy keńeıdi. Sondyqtan biz aldaǵy ýaqytta kerneýi 10 kV avtomattandyrylǵan aýa sóndirgishterin de shyǵarýdy kózdep otyrmyz, - dep qorytty oıyn «Astels» kompanııasynyń atqarýshy dırektory.