Álemdik operanyń prımadonnasy Anna Netrebko Qazaqstanda kontsert berýde
ASTANA. QazAqparat - Opera ónerindegi suranysy eń joǵary ánshi - Anna Netrebkonyń Qazaqstanda alǵashqy kontserti ótýde. Álemniń eń úzdik sahnalaryn baǵyndyrǵan ol búgin «Astana Opera» sahnasynda Astana kúni qarsańynda óner kórsetip jatyr.
"Men qazaqstandyqtardy elorda kúnimen quttyqtaımyn. Óte kórikti, tamasha, jańadan salynǵan qala. Ókinishke oraı, kórgenim azdaý boldy. Astanaǵa kesh keldim de, tek kóliktiń ishinde otyryp, kórip shyqtym. Bul qala týraly men tek jaqsy sózderdi estigen bolatynmyn. Munda turatyn adamdar óte qonaqjaı, aqkóńil. Maǵan unaıdy. Barlyqtaryna densaýlyq, baqyt, uzaq ǵumyr tileımin", - dedi ánshi búgin kontsert aldyndaǵy brıfıngte.
Onyń aıtýynsha, "Astana Opera" elordalyq teatry óziniń kórigimen ony qatty tańqaldyrǵan. "Óte ádemi keshen. Teatrdyń syrty da, ishi de minsiz. Orkestr asa sezimtal, meniń ánderimdi myqty súıemeldep shyǵa bildi. Bir daıyndyqtyń ózinen barlyǵy qoldan keldi. Teatr týraly byltyr barlyq jýrnaldar jazdy. Álemniń tanymal tabloıdtary maqala arnap jatty. Bul keremet teatrda án salýǵa múmkindik alǵanyma qýanyshtymyn. Menińshe, akkýstıka jaǵynan min joq. Maǵan sahnada óte yńǵaıly boldy", - dep atap ótti ol. Opera ánshisi bolashaqta da qaıta kelip, taǵy da Astana jurty úshin án salýy múmkindigin jasyrǵan joq. "Men Astana Marıın teatrymen tyǵyz baılanys ornatqandyǵyn bilemin. Keleshekte solarmen birge kelýim bek múmkin. Astanadaǵy jobalarǵa qatysty birqatar usynystar bar, biz olardy qarap jatyrmyz. Degenmen barlyǵy ýaqyttyń enshisinde", - dedi A. Netrebko. Anna Netrebko óziniń Qazaqstandaǵy tyńdaýshylaryna arnap «Manon Lesko» operasynan Manonnyń «In quelle trine morbide» arııalaryn, «Andre Shene» operasynan Madlenniń «La mamma morta» arııalaryn, «Adrıana Lekývrer» operasynan Adrıananyń «Io son l'umille ancella» arııalaryn, «Sý perisi» operasynan Sý perisiniń «Song to the Moon» arııalaryn jáne basqasyn oryndaıdy. Prımadonnamen birge sahnada óner kórsetetin keshtiń arnaıy qonaqtary - asqan sheber skrıpkashy Vadım Repın (Belgııa) jáne Marıınskıı teatrynyń solısti Ahmed Aǵadı (Reseı). Tyńdarman nazaryna usynylatyn shyǵarmalar: «Travıata» operasynan Stretta dell'introduzione et Brindisi «Libiamo ne'lieti calici», «Syǵan qyzdyń» skrıpka men orkestrge arnalǵan kontserttik rapsodııasy, «Karmen» operasyndaǵy taqyryptar Fantazııasy jáne t.b. Kontsert «Astana Opera» sımfonııalyq orkestri men horynyń súıemeldeýimen ótedi. Dırıjerlyq tizginde - QR Eńbek sińirgen qaıratkeri Abzal Muhıtdınov. Hormeıster - QR Eńbek sińirgen qaıratkeri Erjan Dáýitov.
