Álemdik óner juldyzdary Nur-Sultanda tegin kontsert beredi
NUR-SULTAN. QazAqparat - Jazdyń alǵashqy kúnderi Nur-Sultan qalasynda VIII halyqaralyq «Astana keshteri» atty óner festıvali ótedi, dep habarlaıdy QazAqparat tilshisi «Qazaqkontsert» memlekettik kontserttik uıymynyń baspasóz qyzmetine silteme jasap.
Maýsym aıynyń 3-7 aralyǵynda ótetin «Astana keshteri» óner festıvali - mýzykalyq óner keńistigindegi aıtýly oqıǵalardyń biri. Bıyl halyqaralyq festıval aıasynda otandyq jáne álemdik óner juldyzdary bir sahnada óner kórsetip, 5 qaıyrymdylyq kontsertin ótkizedi.
«Astana keshteri» festıvaliniń uıymdastyrý komıtetiniń tóraıymy Darıǵa Nazarbaevanyń bastamasymen atalmysh óner merekesin jyl saıyn ótkizý 2012 jyldan beri dástúrge aınalǵan. Festıvaldiń basty maqsaty - halyqtyń túrli áleýmettik toptaryna álemdik ónerdiń jaýharlaryn tamashalaýǵa múmkindik berý. Sondyqtan qaıyrymdylyq maqsatta ótkiziletin bul jobanyń kontsertterine barlyq bıletter tegin taratylady. Álemde teńdesi joq festıvaldiń erekshe qonaqtary - múmkindigi shekteýli jandar. Uıymdastyrýshylar olarǵa kontsertke kelýi úshin arnaıy kólikpen qamtamasyz etedi», - delingen uıymnyń habarlamasynda.
Álemniń úzdik sahnalaryn baǵyndyrǵan tanymal óner juldyzdary klassıka, halyq óneri, estrada baǵytyndaǵy mýzykanyń ozyq úlgilerin tartý etpek. Kontsertter «Qazaqstan» OKZ, «Astana opera» kameralyq zaly, QazUÓ organ zaly syndy Nur-Sultannyń úzdik sahanalarynda ótedi.
Bıylǵy festıval Qazaqstannyń eń úzdik opera daýystarynyń biri, kóptegen halyqaralyq baıqaýlardyń laýreaty, QR eńbek sińirgen qaıratkeri Medet Shotabaevtyń benefısimen ashylmaq. Kesh qonaqtary - Reseı Úlken teatrynyń jetekshi solısi Anna Aglatova, A.Navoı atyndaǵy Ózbek memlekettik úlken teatrynyń solısi, Ózbekstannyń halyq artısi Ramız Ýsmanov, Marıınskıı teatrynyń solısi Natalıa Pavlova.
«4 maýsymda Kameralyq mýzyka keshinde ıtalıandyq jáne qazaqstandyq sahna sheberleri óner kórsetedi. Italııanyń atynan álemge áıgili altıst Anna Serova, fortepıano dýeti Marko Skıavo - Serdjo Markedjanı, al bizdiń eldiń atynan áıgili pıanıst, «Qurmet» ordeniniń ıesi, «Forte Trio» memlekettik trıosynyń jetekshisi Tımýr Ýrmancheev, kóptegen halyqaralyq baıqaýlardyń laýreattary Dınara Bazarbaeva-Sahaman (skrıpka) jáne Murat Narbekov (vıolonchel) shyǵady. 5 maýsymda sımfonııalyq mýzykasúıer qaýym zamanymyzdyń eń tańdaýly pıanısi Behzoda Abdýraımova (Ózbekstan-AQSh) jáne QR halyq artısi Aıman Musahodjaeva syndy qos juldyzdyń kontsertine barady», - delingen habarlamada.
Organ kontsertterine bıylǵy 6 maýsymda Parıjdegi Áýlıe Nıkolıa dıý Shardone shirkeýiniń organısi Marı-Anes Gral-Mene keledi.
Festıval 7 maýsymda «4 roıal & alt» aspapty kontsertimen aıaqtalady. Italıandyq altıst Anna Serova Qazaqstanda tuńǵysh ret Roberto Molınellıdiń «Lady Walton's Garden» shyǵarmasyn oryndaıdy. Sondaı-aq bul kontsertti Abaı atyndaǵy MAOBT bıshisi Nelson Penıamen juptasqan argentınalyq tangomen támamdaıdy.
Bıletterdi «Qazaqstan» ortalyq kontsert zalynyń kassasynan tegin alýǵa bolady.
