Álemdik naryqtarda munaı baǵasy tómendep ketti
ASTANA. Tamyzdyń 11-i. QazAqparat - Tamyzdyń 10-yndaǵy saýdanyń qorytyndysy boıynsha Nıý-Iork bırjasynda Light Sweet munaıynyń resmı baǵasy 1,23 dollarǵa tómendep, 80,23 dollar/barreldi qurady, dep habarlaıdy RBK agenttigi.
London bırjasynda munaı baǵasy tipti 80 dollar/barrelden tómendep ketti. Atap aıtqanda, Brent munaıynyń resmı baǵasy, keshegi saýdanyń qorytyndysy boıynsha, 1,39 dollardan arzandap, 79,60 dollar/barreldi shamalady.
«Qara altyn» baǵasynyń quldyraýyna eń aldymen dollar baǵamynyń nyǵaıýy sebep bolyp otyr, deıdi sarapshylar. Amerıkan valıýtasynyń eýroǵa jáne basqa da jetekshi álemdik valıýtalarǵa qatysty baǵamy ósýin jalǵastyrýda.
Oǵan qosa, shilde aıynda munaıǵa degen suranystyń birshama qysqarǵany týraly Qytaıdan jetken aqparat ta munaı naryǵyna qysym jasady. Atap aıtqanda, shilde aıynyń qorytyndysy boıynsha Aspanasty eli 19 mıllıon tonna munaı ımporttaǵan, bul sonyń aldyndaǵy aıda qol jetkizilgen rekordtyq kórsetkishten - 22,27 mıllıon tonna - 3,1 paıyzǵa tómen jáne 19,6 mıllıon tonna 2009 jyldyń shilde aıyndaǵy kórsetkishke de jetpeıdi.
