Álemdik moıyndaýdyń aıqyn kórinisi

ASTANA. QazAqparat - Qazaq eli halyqaralyq arenada kezekti jeńisine qol jetkizdi. BUU Qaýipsizdik Keńesiniń turaqty emes músheligine 2017-2018 jyldar kezeńine saılandy. Halyqaralyq uıymnyń eń mártebeli keńesine múshelikke ótý úshin úmitker elder BUU-ǵa múshe 193 memlekettiń, kem degende, 129-ynyń daýysyn alýy tıis edi. Azııa-Tynyq muhıt elderi tobynan Taılandpen básekege túsken Qazaqstan 138 daýys jınady. Sarapshylar Qazaqstannyń bul jeńisine elimizdiń ıadrolyq qarýdan bas tartý saıasatyn ustanýy, Elbasynyń «Álem. HHІ ǵasyr» manıfesiniń erekshe yqpal etkendigin de alǵa tartýda. Eń bastysy, álemdik qaýymdastyq Qazaqstannyń halyqaralyq deńgeıdegi izgi bastamalaryn joǵary baǵalap otyr. Osyǵan oraı oqyrman nazaryna Atyraý jurtshylyǵynan kelip túsken hattardyń bir tobyn usynyp otyrmyz.

Biz - beıbitshilikti súıetin elmiz

 Qazaqstan Azııa-Tynyq muhıt memleketter tobynyń atynan BUU-nyń asa mańyzdy saıası organynyń jumysyna resmı túrde qatysatyn bolady. Bul organǵa jahandyq beıbitshilik pen qaýipsizdikti qoldaý jónindegi ókilettilikter júktelgen. Mine, osyndaı mártebege Qazaqstannyń ıe bolýy - Memleket basshysy Nursultan Nazarbaevtyń halyqaralyq bedelin álemdik turǵydan taný, onyń serpindi jahandyq bastamalaryna berilgen bıik baǵa. BUU-nyń Qaýipsizdik Keńesine múshelikke ótý elimiz úshin kóptegen memlekettermen qarym-qatynasty damytýdyń jańa múmkindikterin ashady. Álemdik qaýymdastyqtyń aldynda qazir burynǵydan da berik toptasý jáne beıbitshilik pen turaqtylyqty nyǵaıtý jóninde pármendi sharalar qabyldaý mindeti tur. Jahandyq qaýipsizdikti jáne halyqaralyq qatynastardaǵy senim sharalaryn nyǵaıtý jónindegi jaýapty mıssııany elimizdiń laıyqty oryndap shyǵatyndyǵyna senemin.

Erkin QADYRǴALIEV,

Atyraý oblysy Qazaqstan halqy Assambleıasy tóraǵasynyń orynbasary - hatshylyq meńgerýshisi.

Qazaqstanǵa berilgen joǵary baǵa Qaýipsizdik Keńesi

- Birikken Ulttar Uıymynyń eń joǵarǵy organy. Jáne ol óte bedeldi, eń bir demokratııalyq keńes bolyp tabylady. Ondaǵy bir daýystyń ózi sheshýshi rol atqarady. Batys Eýropa elderi tobynan aldaǵy eki jylǵa sońǵysy bolyp ne Italııa, ne Nıderland saılanýy tıis edi. Biraq, atalǵan memleketterdiń ekeýi de qajetti daýys kólemin jınaı almady. Sóıtip, Italııa men Nıderland mámileli sheshimge keldi. Olar Qaýipsizdik Keńesindegi ókilettilik merzimderin bir-bir jyldan atqaratyn boldy. Al, Qazaqstan múshelikke ótý úshin úmitker elder arasynan aı-qyn basymdyqpen jeńiske jetti. Muny elimizge degen úlken senimniń belgisi dep baǵalaýymyz kerek. Halyqaralyq saıasatymyzdyń qundylyǵy da osy jerden kórinip otyr. El táýelsizdiginiń 25 jyldyq mereıli datasymen sáıkes kelgen halyqaralyq arenadaǵy zor jeńisimizdiń sımvoldyq máni de zor.

Qatımolla RIZÝANOV,

oblystyq ardagerler keńesiniń tóraǵasy.

Asqaq abyroı, zor mereı

 Astananyń týǵan kúni merekesi qarsańynda Birikken Ulttar Uıymynyń Qaýipsizdik Keńesine turaqty emes múshe bolyp saılandyq. Bul sheshim shyqqansha barsha qazaqstandyqpen birge biz de elimizdiń tileýin tilegen edik. Kúlli álemniń qaýipsizdigin qadaǵalaıtyn bul keńeske múshe bolý - el táýelsizdigi men damý turaqtylyǵynyń kepili. Ár qazaqstandyq úshin zor mártebe. Bul sharanyń eldiń qaýipsizdigin saqtaýmen birge, agrarlyq sektorǵa, shaǵyn jáne orta bıznes arqyly jumys oryndaryn qurý men eldiń eksporttyq áleýetin damytýǵa úlken áseri bolatyny qýantady. Sonymen, tarıhta alǵash ret jahandyq qaýipsizdik pen beıbitshilikti saqtaýǵa ókilettiligi bar eń mańyzdy saıası organnyń quramyna saılanǵan memleket atandyq. Bul - bıik beles, úlken jaýapkershilik.

Eleýsin SÁRSEMBIEV,

«Aýyl» halyqtyq-demokratııalyq patrıottyq partııasynyń Atyraý oblystyq fılıaly tóraǵasynyń orynbasary.

Jańa múmkindikke jol ashady

 Qanshama qıyndyqty bastan ótkerse de qazaqtyń rýhy muqalǵan joq. Kerisinshe, namysy qaırala tústi. Táýelsiz el atanǵan shırek ǵasyrda talaı belesti baǵyndyrdyq. Kúni keshe ǵana BUU Bas Assambleıasynda Qaýipsizdik Keńesiniń 2017-2018 jyldardaǵy turaqty emes músheligine saılanýymyz - taǵy bir jetistigimiz. Jıyrma bes jyldaǵy kezekti jeńisimiz. Azııa-Tynyq muhıt elderi tobynan bir orynǵa eki bedeldi úmitker - Qazaqstan men Taıland talasyp, elimiz 138 daýys jınady. Qazaqstan budan buryn eshqashan BUU Qaýipsizdik Keńesine múshelikke saılanyp kórgen emes. Al, Taıland - Azııadaǵy ekpindi damyp kele jatqan memleket, mádenıeti, qolóneri, syrtqy dúnıemen baılanysy ábden pysyqtalyp, jolǵa qoıylǵan el. Qorytyndysynda Astana aıqyn jeńiske jetti. Uıymǵa múshelikke ótý úshin úmitker elder BUU-ǵa múshe 193 memlekettiń kem degende 129-ynyń daýysyn alýy tıis eken. Al, myna jeńis bizdiń mereıimizdi taǵy bir márte kóterdi. Bul - Qazaqstannyń halyqaralyq bedeliniń kezekti bir márte moıyndalýy. Damyǵan elder arasynda elimiz ustanǵan saıasattyń joǵary baǵalanyp otyrǵanynyń kórinisi.

Ulyqbek TІNÁLIEV,

«Qazaqstannyń táýelsiz urpaǵy» qoǵamdyq birlestiginiń dırektory.

Pikirler «Atyraý» gazetiniń https://www.atr.kz saıtynan alyndy.