Álemdik qoǵamdastyqtaǵy qazaqstandyq mádenıettiń róli talqylandy
ASTANA. QazAqparat - Búgin «Nur Otan» partııasynyń uıytqy bolýymen «NurOtanTalks» alańynda jahandyq álemdegi qazaqstandyq mádenıettiń róli jan-jaqty talqyǵa tústi, dep habarlaıdy QazAqparat tilshisi.
«Búgingi taqyryp bir qaraǵanda qazirgi qazaqstandyq qoǵamnyń problemalarynan ajyrap qalǵandaı kórinedi. Buǵan qosa bul taqyryptyń bizdiń elimiz, jalpy kez kelgen memleket úshin strategııalyq máni bar ekendigin túsiný qajet. Qazirgi álemdegi, álemdik qoǵamdastyqtaǵy kez kelgen memlekettiń róli álemdik mádenıetke qosqan zor úlesimen aıqyndalady», - dedi konferentsııa jumysyn ashqan «Nur Otan» partııasy tóraǵasynyń birinshi orynbasary Máýlen Áshimbaev.
Sonymen qatar, ol Memleket basshysy Nursultan Nazarbaev óziniń «Bolashaqqa baǵdar: qoǵamdyq sanany jańǵyrtý» atty maqalasynda «Jahandyq álemdegi qazaqstandyq mádenıet» jobasyn júzege asyrýdy usynǵanyn eske saldy. Al bul joba Qazaqstandy álemge tek munaı óndirýmen ǵana emes mádenıet salasyndaǵy jetistikterimen de tanytýdyń joly ekendigin basa aıtty.
Іs-sharaǵa Qurmanǵazy atyndaǵy Qazaq ulttyq konservatorııasynyń rektory, «Qazaqstandaǵy 100 jańa esim» jobasynyń jeńimpazy Arman Júdebaev, 71-shi Halyqaralyq Kann kınofestıvaliniń «Úzdik áıel róli» atalymy boıynsha jeńimpazy, belgili aktrısa Samal Eslıamova, Nıý-Iork kınoakademııasynyń (MFA) túlegi, halyqaralyq jáne respýblıkalyq kınofestıvalderdiń laýreaty, rejısser, stsenarıst, akter, dokýmentalıst Dıas Ázimjan, «TSE Art Destination» art-alańy men «Artios» kreatıvti agenttiginiń negizin qalaýshy, ónertanýshy, «Nur álem» Qazaqstan ulttyq pavılonyndaǵy qazirgi zamanǵy óner jıyntyǵy men «Astana Art Show» halyqaralyq kórmesiniń kýratory Dına Baıtasova qatysty.
