Álemdik qoǵamdastyq senimsizdik sheńberinen shyǵa almaı otyr - Nursultan Nazarbaev

ASTANA. QazAqparat - Beıbitshilik, ál-aýqat pen molshylyq adamzat damýynyń negizgi tendentsııasyn aınala almady. Bul týraly búgin elordada  ótip jatqan Álemdik jáne dástúrli dinder kóshbasshylarynyń  VI sezinde QR Prezıdenti Nursultan Nazarbaev aıtty, dep habarlaıdy QazAqparat tilshisi.

«Ótken sezden bergi 3 jyldyń ishinde Qazaqstan elordasynda jahandyq deńgeıdegi mańyzdy sharalar uıymdastyryldy. Astanada qabyldanǵan sheshimder halyqaralyq keń rezonansqa ıe boldy. Óıtkeni, ol bitimgershilik, seriktestik, toleranttylyq jáne jasampazdyq ıdeıalaryn sińirgen. Bul barynsha mańyzdy. Sebebi álem, ókinishke oraı, týrbýlenttik jaǵdaıǵa enip otyr. Bizdiń barlyǵymyzdy, saıasatkerler men dinı qaıratkerlerdi  sanktsııalyq teketirester, dinaralyq jáne dinishilik qaıshylyqtar,  saýda soǵystary, qorshaǵan ortanyń lastanýy alańdatpaı qoımaıdy», - dedi Nursultan Nazarbaev.

Elbasynyń paıymynsha, ǵylymı-tehnologııalyq progress aıasynda órkenıetaralyq janjaldar  maǵynasyz kórinedi. Ortaq ǵalamsharymyzdy kelesi urpaqqa qandaı jaı-kúıde bere alatyndyǵymyz basty problemaǵa aınalyp otyr.

«Biz  úshinshi myńjyldyqta 18 jyl ómir súrýdemiz. Biraq, beıbitshilik, ál-aýqat pen molshylyq adamzat damýynyń negizgi tendentsııasyn aınala almady. Álemdik qoǵamdastyq ózara senimsizdik, jek kórýshilik  jáne janjaldardyń zulymdyq sheńberinen shyǵa almady. Biz jaǵdaı túzelmek turmaq nasharlaı túskenin kórip otyrmyz. Elder men saıası bloktar arasynda jańa qabyrǵalar, jańa temir shymyldyqtar turǵyzylýda. Biraq eń qaýiptisi - adamdardyń aqyl-oılary men júrekterinde ózara jatsynýshylyq kúsheıe túsýde», - dedi QR Prezıdenti.