Álemdik qaýymdastyqtar Sırııa tarıhynyń qaıǵyly paraǵyn jabýy kerek

NUR-SULTAN. QazAqparat - Álemdik qaýymdastyqtar Sırııa tarıhynyń qaıǵyly paraǵyn jabýy kerek. Sırııa boıynsha Astana protsesiniń sońynda QR Syrtqy ister birinshi vıtse-mınıstri Muhtar Tileýberdi osylaı málim etti, dep habarlaıdy QazAqparat tilshisi.

«Álemdik qaýymdastyqtar Sırııa tarıhyndaǵy qaıǵyly paraǵyn jabýy kerek. Astana protsesine qosylǵysy keletin birqatar elderdiń tilegi - jańa amaldy paıdalana otyryp, saıası jáne gýmanıtarlyq máseleler boıynsha daǵdarysty sheshýge bir qadam qalǵanymyzdy kórsetip otyr. Qazaqstan barlyq elderdi osynaý ortaq maqsatqa jumylyp, Astana jáne Jeneva protsesine qoldaý bildirýge, Sırııa Arab Respýblıkasyndaǵy zorlyq-zombylyq qaqtyǵystaryna tezirek núkte qoıýǵa kúsh salýǵa shaqyrady. Osy múmkindikti paıdalana otyryp, BUU-nyń Sırııa boıynsha jańa ýákili, halyqaralyq dárejedegi qurmetti dıplomat Geer Pedersonǵa sáttilik tileımin», - dedi QR Syrtqy ister birinshi vıtse-mınıstri Muhtar Tileýberdi.

Eske sala ketsek, búgin elordada Sırııa boıynsha Astana protsesiniń 12-shi raýndy aıaqtaldy.

Kelissózderdiń qorytyndysy boıynsha kepilger elder - Iran, Reseı men Túrkııa birlesken málimdeme jasady. Kepilger elder Sırııaǵa gýmanıtarlyq kómekti arttyrýǵa shaqyryp otyr.