Álemdik qaýymdastyq máıit aǵzalaryn paıdalaný boıynsha Qazaqstan xalqyna úndeý jasaıdy

ASTANA. QazAqparat - Ótken jyly Qazaqstanda adam aǵzalaryn transplanttaý boıynsha 926 operatsııa jasaldy, dep xabarlaıdy QazAqparat tilshisi.

QR Densaýlyq saqtaý mınıstri Eljan Birtanovtyń aıtýynsha, elimizde týǵan-týystar arasynda donor bolý tájirıbesi jaqsy damyp jatsa, máıittiń aǵzalaryn paıdalaný júıesi turalap qalǵan. «Alaıda bizde arnaıy zań bar. Ony 2009 jyly qabyldaǵan bolatyn. Halyq arasynda da keńinen talqylandy. Soǵan qaramastan, xalyq tarapynan narazylyq aıtylyp jatyr. Árıne, osy másele boıynsha bir kelisimge kelý qıyn. Sonyń saldarynan bireýdiń ómirin saqtap qalýǵa tyrysatyn dárigerlerge kiná artylyp jatady. Olaı jalǵasa berse, meniń áriptesterim kezekte turǵan adamdardyń ómirin saqtap qalýǵa tartynatyn shyǵar», - dedi Birtanov búgin xalyq aldynda esep berý kezdesýi kezinde.

Mınıstrdiń aıtýynsha, vedomstvo máıittiń aǵzalaryn donorǵa salý jaıyn jan-jaqty túsindirý sharalaryn jalǵastyrady. Oǵan qosa, Dúnıejúzilik densaýlyq saqtaý uıymy da osy másele boıynsha óz ustanymyn jarııalaıdy.

«Ókinishke qaraı, bizdegi transplantologııanyń damýy kóp adamdyń ómirin saqtap qalýǵa múmkindik bermeıdi. Sonyń saldarynan kóbisi shetelge barýǵa májbúr. Olardyń ishinde balalar da bar», - dep atap kórsetti mınıstr.

Aıta keteıik, ótken jyly jasalǵan otalardyń ishinde 12-si - júrek almastyrý, 1 - ókpe transplantatsııa, sondaı-aq 204 ret búırek almastyrý otasy jasaldy. Budan bólek, teri, súıek kemigi, baýyr jáne taǵy basqa aǵzalardyń transplantatsııasy ótkizildi.
Buǵan deıin habarlaǵanymyzdaı, aqtóbelik dárigerler 22 jastaǵy jigittiń eki búıregin eki adamǵa esh ruqsatsyz salyp bergen bolatyn.

Bul oqıǵa boıynsha Densaýlyq saqtaý mınıstri Erjan Birtanov óz pikirin bildirgen edi. Sondaı-aq, №2 Aqtóbe qalalyq sotynda marqumnyń qaryndasy Baldáýren Nurbylaevanyń aryzy qaraldy.