Álemdik iri ınvestorlar jańartylatyn energııaǵa ınvestıtsııa quıýǵa daıyn – sarapshy

ASTANA. QazAqparat – Qazir elimizde 114 mlrd gıgavatt bar, onyń 4 mlrd-yn jańartylatyn energııa kózi bóledi. Bul shamamen 3%. Jańartylatyn energııa kózine kóshý týraly tolyǵyraq «Ecojer» assotsıatsııasynyń atqarýshy dırektory Qýanysh Baltabaev aıtyp berdi, dep habarlaıdy QazAqparat tilshisi.

«Búginde jańartylatyn energııaǵa kóshý boıynsha birqatar joba iske asyp jatyr. Jyl basynan beri Qazaqstan osy baǵytta birneshe kelisimge qol qoıdy. Atap aıtqanda, Frantsııamen 1 gıgavatqa úkimetaralyq kelisimge keldi, dál osyndaı úkimetaralyq kelisim jaqynda Memleket basshysynyń Qytaıǵa sapary qorytyndysy boıynsha jasaldy. Jalpy alǵanda, jańartylatyn energııa arqyly shamamen 6-6,5 gıgavatt energııa qýatyn óndirý josparlanýda», - dedi Qýanysh Baltabaev Astanada ótip jatqan III ECOJER halyqaralyq kongresi barysynda.

Onyń aıtýynsha, jańartylatyn energııaǵa kóshýde ony qaıda salý kerek jáne tarıfke qatysty suraqtar bar.

«Іri energetıkterdi jańartylatyn energııany óndirý máselesi alańdatady. Mysaly, jel bolmaı, birqalypty aýa raıynda qalaı bolady? Biraq ekonomıkalyq tıimdilik týraly aıtatyn bolsaq, ınvestorlar jańartylatyn energııa kózderin salýǵa daıyn. Olar osy sekildi jobalardy masshtabtaýǵa múddeli. Búginde BAÁ, Frantsııa, Qytaı, Úndistannyń ınvestorlary gıgavatty quraıtyn jobalardy salýǵa daıyn. Qazir bizde 114 mlrd gıgavatt bar, onyń 4 mlrd-y jańartylatyn energııa kózi bóledi. Bul shamamen 3%. Bizdiń strategııalyq qujatta 2020 jylǵa qaraı jańartylatyn energııa kózine ótýdi 3%-ǵa jetkizý maqsaty qoıylǵan. Al 2030 jylǵa qaraı 15% jańartylatyn energııa alýymyz kerek, eger biz 6 gıgavattyq energııa óndirý kózin salsaq, atalǵan kórsetkishke qol jetkizý múmkin dep oılaımyn», - deıdi ol.

Aıta keteıik, elordada III ECOJER halyqaralyq kongresi ótip jatyr.