Álemdik Gran-prı: E.Jumaqanov altynnan alqa taqty
ASTANA. 29 qyrkúıek. QazAqparat - Almaty qalasynda ótip jatqan dzıýdodan álemdik Gran-prıde qazaqstandyq sportshy Eldos Jumaqanov altynnan alqa taqty.
Fınalda ol belarýs Dmıtrıı Shershanmen kezdesti. Beldesý kezinde E.Jumaqanov upaı sany jaǵynan utyldy. Alaıda onyń qarsylasy sylbyr qımyldaǵany úshin sońǵy sekýndttarda tórtinshi eskertý alǵannan keıin qazaqstandyq sportshy jeńimpaz dep tanyldy. «Bul qarsylasymdy jaqsy bilemin. Oqý-jattyǵý jıyndarynda talaı ret kezdestik. Men ony jeńip júrdim. Sodan bolar, osy jolǵy beldesýde sál bosańsyp, basynda qatelik jiberip qoıdym. Sosyn ishteı jınalyp, barymdy saldym. Jankúıerlerdiń qoldaýymen namysty qoldan bermeýge tyrystym», - dedi E.Jumaqanov «KAZsport» telearnasyna bergen suhbatynda.
Aıta keteıik, 66 salmaq dárejesinde Eldos Jumaqanov altynnan alqa taqsa, Qazaqstannyń taǵy bir sportshysy Baqdáýlet Sábıtov qola júldege ıe boldy.
