Álemdik franchaızıng naryǵynyń jyldyq aınalymy 3 trıllıon dollardy quraıdy - Beknur Qısyqov
ALMATY. 22 jeltoqsan. QazAqparat /Erlik Erjanuly/ - Endi franchaızıng úshin adamdar AQSh pen Eýropa elderine emes, Úndistanǵa baratyn bolady.
Bul búgin Almatyda ótken «Qazaqstandaǵy franchaızıngtiń 2012 jylǵy damýyn modeldeý» dep atalatyn dóńgelek ústel jıynynda aıtyldy.
"Franchaızıng koroli sanalatyn AQSh-ta qazir keri ketý úderisi júrip jatyr. Daǵdarystyń nátıjesinde ol barlyq salada 5-7 paıyzǵa deıin kemýde. Álemdik franchaızıng naryǵynyń aınalymy 3 trıllıon dollar bolsa, onyń 2 trıllıony AQSh-tyń úlesinde. Álemdik brendterdiń 80-85 paıyzy AQSh-ta. Amerıka franchaızıngke lyq toldy. Sondyqtan búgingi tańda franchaızıng Qytaı, Indonezııa, Malaızııa men Qıyr Shyǵystyń esebinen qarqyndy ósýde", deıdi Ortalyq Azııa franchaızıng uıymynyń prezıdenti Bektur Qısyqov. Onyń aıtýynsha, qazirgi kezde Úndistan álemdik brendterdiń negizgi tasymaldaýshysy bolyp otyr. Anglııanyń otary bolǵan bul elde aǵylshyn tilinde sóıleıtinderdiń úlesi álemde eń joǵary dep sanalady. Úndistan túrli franchaızıngtik tehnologııalardy óńdeýge jáne engizýge óte qolaıly. Qytaımen salystyrǵanda onyń ekonomıkasy barynsha ashyq. Bıznesti júrgizý jaǵynan Úndistan AQSh-pen bir deńgeıde tur. Al Qytaı álemdik brendterdi tasymaldaýda 2-shi orynda keledi. 1,5 mıllıard adamdyq tutyný naryǵy bar bul el qazir franchaızıng satýdy belsendi júrgizýde. Eýropaǵa kıim-keshek, kosmetıka sııaqty 40-50 jelide qytaılyq brendter kóptep jetkizilip jatyr.
