Álemdik ekonomıkanyń qalpyna kelý belgileri qandaı
«Halyqty vaktsınatsııalaý qarqyny álemdik ekonomıkany qalpyna keltirýdiń basty shartyna aınaldy. Izraıl, AQSh, Ulybrıtanııany qosa alǵanda, damyǵan elder jappaı vaktsınatsııany birinshi bolyp bastady, aýrýdyń tómendeýin tirkep, qatań shekteýlerdi birtindep alyp tastady. Izraıl basqa elderden ozyp, bıylǵy jylǵy sáýirde eresek turǵyndardyń vaktsınatsııalanýyn aıaqtaýdy josparlap otyr. Eýroodaqta koronavırýs taralýynyń joǵary deńgeıine jáne vaktsınalardy jetkizýdegi kidiristerge, sonyń ishinde óndirýshi elderdiń vaktsınalyq protektsıonızmine baılanysty qatań shekteýler qoldanylýda», - dedi UB basshysy Úkimet otyrysynda bıylǵy qańtar-naýryzda eldiń áleýmettik-ekonomıkalyq damý qarqynyn talqylaý kezinde.
Onyń aıtýynsha, vaktsınalaý qarqyny boıynsha damýshy elder damyǵan elderden aıtarlyqtaı artta qalyp otyr, bul álemdik ekonomıkanyń birkelki qalpyna kelýine kedergi keltiredi. Vaktsınatsııamen ilgerileý esebinen damyǵan elder retsessııadan birinshi bolyp shyǵady jáne álemdik ekonomıkanyń ósý draıverlerine aınalady.
«Halyqaralyq valıýta qory sáýirdegi baıandamasynda álemdik ekonomıkanyń ósýi boıynsha boljamdy 2021 jyly 5,5 paıyzdan 6 paıyzǵa deıin jaqsartty. Onyń ishinde damyǵan elder boıynsha – 4,3 paıyzdan 5,1 paıyzǵa deıin, damýshy elder boıynsha – 6,3 paıyzdan 6,7 paıyzǵa deıin jaqsartty. Qazaqstan boıynsha Halyqaralyq valıýta qory 3,2 paıyz deńgeıinde ósýdi kútýde, bul aldyńǵy boljamnan 0,2 protsenttik tarmaqqa joǵary», - dedi E. Dosaev.
«Bıylǵy jylǵy naýryzda jahandyq ekonomıkalyq belsendilik ındeksiniń 53,2 tarmaqtan
54,8 tarmaqqa deıin ósýi álemdik ekonomıkanyń qalpyna kelý belgilerin rastaıdy, bul sońǵy 6,5 jyldaǵy eń joǵary kórsetkish bolyp sanalady. Indekske AQSh úlken úles qosty, onda ındeks 59,7-ge jetti, bul jeke sektordaǵy 2014 jyldan bergi eń tez qalpyna kelýdi bildiredi. Sonymen qatar Germanııa, Ulybrıtanııa, Úndistan, Avstralııa jáne Qytaı eń kóp úles qosty», - dedi ol.