Álemdik ekonomıkadaǵy shıkizatqa 2000 jylǵy buryn-sońdy bolmaǵan suranystyń ósýi aıaqtaldy
ASTANA. 8 naýryz. QazAqparat - Qytaı ekonomıkasynyń qýatty kóterilýi týǵyzǵan 2000 jyly paıda bolǵan álemdik ekonomıkadaǵy shıkizat taýarlaryna suranystyń ósý tsıkli aıaqtaldy.
Shveıtsarııanyń kólemi jaǵynan ekinshi "Kredı Sıýıss" banki osyndaı boljam jasady, dep habarlady ITAR-TASS.
«Infraqurylym salasyndaǵy alyp jobalardy júzege asyrýdyń onjyldyǵynan keıin Qytaı ishki tutyný naryǵyn damytýǵa kóshti, bul onyń shıkizatqa degen suranysyn edáýir azaıtady, dep atap ótedi "Kredı Sıýıss" taldamashylary. - Bizdiń esepterimiz QHR ІJÓ ósýiniń árbir jańa paıyzynda tabıǵı taýarlardy tutynýdy qysqartý úderisi bastalǵanyn kórsetedi».
Shveıtsar bankiniń pikirinshe, Qytaı ekonomıkasynda ulttyq ınfraqurylymǵa, turǵyn úı qurylysyna, eksporttyń ósýine ınvestıtsııalardyń «altyn ǵasyry ótti». Ol sondaı-aq QHR ekonomıkasyn yntalandyrýdyń memlekettik saıasaty da óziniń «sharyqtaý shegine jetti» dep sanaıdy.
«Bizdiń boljamymyzsha, taıaýdaǵy onjyldyqta Qytaı ekonomıkasy ósýiniń qarqyny budan burynǵy on jyldaǵy 10,7 paıyzben salystyrǵanda, ІJÓ-niń 7-8 paıyzy deńgeıinde bolady», - delingen baıandamada.
Degenmen "Kredı Sıýıss"-tiń pikirinshe, Qytaıda ýrbanızatsııa - qalalardy damytý, sondaı-aq kúrdeli qurylys, eń aldymen, turǵyn úıler qurylysy keńinen jalǵasady. Alaıda úkimettiń aldaǵy jyldardaǵy negizgi kúsh-jigeri ishki tutyný naryǵyn damytýǵa shoǵyrlanady.
