Álemdik dinder kóshbasshylary seziniń tuǵyrnamasy musylman elderiniń birligin saqtaıtyn shara retinde qoldanylady

Bul týraly búgin Aqordada elimizge resmı saparmen kelgen Mysyr Arab Respýblıkasynyń Prezıdenti Ábdel Fattah As-Sısımen kelissózderden keıingi birlesken málimdemede Elbasy Nursultan Nazarbaev aıtty.

«Álemdik jáne dástúrli dinder kóshbasshylary seziniń tuǵyrnamasyn musylman elderiniń birligin saqtaıtyn, dinimizdiń tolerattylyǵy men beıbitshilik súıgishtigin kórsetetin shara retinde qoldanýǵa ýaǵdalastyq»,-  dedi QR Prezıdenti.

Sonymen qatar Memleket basshysy jahandyq ıadrolyq qarý-jaraqty taratpaý, ıadrolyq qarýdan ada aımaqtar qurý mańyzdylyǵy jóninde de pikir almasylǵanyn basa aıtty.

«Búgin biz Qazaqstan-Mysyr qarym-qatynastarynyń jańa kezeńiniń bastalǵanyna kýá bolyp otyrmyz. Joǵary mártebeli Ábdel Fattah As-Sısıdiń Qazaqstanǵa alǵashqy resmı sapary yntymaqtastyqqa tyń serpin bererine senimdimin. Búgin aıqyndalǵan ózara is-qımyl baǵyttary elderimiz arasyndaǵy baılanysty odan ary nyǵaıtyp, halyqtarymyzdyń ıgiligin eseleı túsedi dep senemin»,-  dedi Elbasy.