Álemdik din kóshbasshylary kelerde elordada qaýipsizdik sharalary kúsheıtiledi – polıtsııa
Bul týraly elordalyq polıtsııa departamenti basshysynyń birinshi orynbasary Baqytjan Malybaev aıtyp berdi.
«Elordada halyqaralyq mańyzy bar iri is-sharalar únemi ótkizilip turady. 13-15 qyrkúıek aralyǵynda Rım Papasy Frantsısk Nur-Sultanǵa memlekettik saparmen kelip, álemdik jáne dástúrli dinder lıderleriniń XX Hatshylyǵy men VII sez otyrysy ótedi. Osy is-sharalar qarsańynda 8 tamyzdan bastap 8 qyrkúıekke deıin Ulttyq qaýipsizdik komıteti departamenti men Memlekettik kúzet qyzmeti birlesip, qala aýmaǵynda «Ýchaske» jedel-aldyn alý sharasyn ótkizedi», - dedi B. Malybaev elordada ótken baspasóz máslıhatynda.
Spıker bul sharalardyń kóptegen sheteldik qonaqtardyń kelýine jáne birqatar memlekettik saparlarǵa baılanysty ótetinin túsindirdi.
Baqytjan Malybaev elordada jalǵa beriletin páterler, qaraýsyz qalǵan úıler, sondaı-aq qarý ıeleri tekseriletinin aıtty.
«Turǵyndardan qabyldanyp jatqan sharalarǵa túsinistikpen qarap, ótetin is-sharalarǵa jan-jaqty kómek kórsetýdi suraımyz», - dedi spıker.
Aıta keteıik, 19 shildeden bastap elordada «Qaýipsiz jol» jedel-aldyn alý sharasy ótip jatyr. Osylaısha, bir aıda jol qozǵalysy erejelerin buzýdyń 11,5 myń jaǵdaıy anyqtalǵan. Mas kúıinde kólik júrgizgeni úshin – 80 adam, apat týdyrǵany úshin – 224, qarsy qozǵalys jolaǵyna shyqqany úshin – 61 jáne baǵdarshamnyń tyıym salynǵan belgisine ótkeni úshin – 315 adam ustaldy.
