Álemdik derjavalar ázirge Qyrǵyzstandaǵy jaǵdaıǵa aralaspaı tura-turǵandary durys
ASTANA. Sáýirdiń 13-i. QazAqparat /Aıdar Ospanalıev/ - «AQSh-qa nemese ózge de álemdik derjavalarǵa Qyrǵyzstandaǵy jaǵdaıǵa aralasyp, onda ózderiniń áskerlerin kirgizýiniń qajeti joq»,
dep málimdedi búgin AQSh-tyń Qaýipsizdik keńesi janyndaǵy «Kısındjer Assoshıeıted» ǵylymı-zertteý ortalyǵynyń aǵa dırektory Tomas Grehem. Bul týraly ol búgin Prezıdent janyndaǵy Memlekettik basqarý akademııasynda oqyǵan dárisi kezinde aıtty, dep habarlaıdy QazAqparat.
Onyń pikirinshe, búginde Qyrǵyzstan aımaǵyndaǵy jaǵdaı ózgelerdiń aralasýyn qajet etip otyrǵan joq. «Ózge memleketterge qazir qyrǵyz elindegi jaǵdaıdy retteý úshin barynsha dıplomatııalyq quraldardyń kómegine júgingen jón. Bul rette, árıne jaǵdaıdy turaqtandyrý basty másele bolýy tıis. Buny Qyrǵyzstannyń bılik basynda otyrǵandar da quptaıdy. Eldegi jaǵdaıdy turaqtandyrýǵa onymen kórshiles otyrǵan yqpaldy memleketterdiń de kúsh salǵandary durys. Al iri derjavalar bul iske múmkindiginshe eń sońynda aralasýlary kerek», dedi ortalyq dırektory.
