Álemdik deńgeıdegi iri ǵalymdar Astanadaǵy halyqaralyq semınarǵa keldi
ASTANA. 5 sáýir. QazAqparat - Búgin Astanada Nazarbaev Ýnıversıtetinde «Halyqaralyq ǵylymı seriktestikti qalyptastyrý jáne bilim almasý» atty eki kúndik halyqaralyq semınar óz jumysyn bastady.
Onyń jumysyna 300-ge tarta qazaqstandyq ǵalymdarmen qatar, Ulybrıtanııa, AQSh, Reseı, Germanııa, Argentına, Ispanııa jáne Ońtústik Koreıa ýnıversıtetterinen ǵalymdar qatysýda. Energetıka, shıkizatty óńdeý, aqparattyq jáne telekommýnıkatsııalyq tehnologııa, bilim berý salalary boıynsha strategııalyq seriktestikti ornatýǵa baǵyttalǵan sharany QR Bilim jáne ǵylym mınıstrligi men Brıtan Keńesi (British Council) uıymdastyryp otyr.
«Qazaqstan joǵary bilim men ǵylymdy damytýdyń óte aýqymdy ári keremet ulttyq josparyn jasaqtady. Bul brıtandyq ǵalymdar úshin úlken jańalyq boldy. Atalmysh jospar ǵylym, bilim berý júıesi jáne óndiris, ıaǵnı belgili bir ónerkásiptik sala arasynda óte tyǵyz qarym-qatynastar ornatady. Brıtandyq Keńes Qazaqstannyń bul baǵyttaǵy qadamyna qoldaý kórsetýge tyrysýda. Biz Qazaqstan men Ulybrıtanııa ýnıversıtetteri, ǵylymı ortasy, ǵalymdary arasyndaǵy tyǵyz qarym-qatynastardy ornatýǵa jáne kúsheıtýge múddelimiz. Keńes Qazaqstandaǵy joǵary bilim berý júıesin damytýdyń ǵylymı, ozyq ıdeıalaryn qoldaǵysy keledi», - dedi Qazaqstandaǵy Brıtan Keńesiniń dırektory Saımon Ýılıams.
Onyń atap ótkenindeı, Brıtan Keńesiniń qoldaýymen qazirgi ýaqytta Qazaqstannyń 16 joǵary oqý orny Ulybrıtanııanyń eń úzdik ýnıversıtetterimen áriptestik ornatyp, úlken jetistikterge qol jetkizip otyr.
Eki kúndik konferentsııa qorytyndysynda Qazaqstan men Ulybrıtanııa ǵalymdary jáne ýnıversıtetteri áriptestik baılanystaryn ornatpaq. Sonyń negizinde eki el ǵalymdary birlesken jobalardy iske asyrýdy kózdeýde. Shara barysynda túrli sala boıynsha semınarlar ótkiziledi. Sonymen qatar qazaqstandyq oqýshylar men oqytýshylar úshin brıtandyq JOO-lardyń resmı kórmesi ótedi dep kútilýde.
