Álemdik tsırk juldyzdary Astanada shoý jasamaq
ASTANA. QazAqparat - 2014 jyly 1-8 shilde aralyǵy 16:00-da Astana qalasy ákimdigi qoldaýymen jyl saıynǵy «Azııa jańǵyryǵy» 7-shi halyqaralyq tsırk óneri festıvali ótedi.
Festıval ár eldiń ártisteri arasyndaǵy eń myqtylardyń óner dodasy ǵana emes, halyqaralyq qazylar alqasy saraptaıtyn eń iri baǵalaý alańy retinde este qalmaq. «Astanalyq tsırk» manejinde Astana turǵyndary men qonaqtaryna Reseı, Qytaı, Mońǵolııa, Vetnam, Belarýs, ıAkýtııa, Ýkraına, Ózbekstan jáne Qazaqstannyń ártisteri óner kórsetedi. Olardyń kóbi búkilálemdik festıval jeńimpazdary men laýreattary, óz janrlarynyń has sheberleri, tsırk áýletiniń urpaqtary. Festıval baǵdarlamasy ár qatysýshy memleket birigý arqyly ulttyq tsırk erekshelikterin ortaǵa salatyn «jandy» ári biregeı shoýǵa qanyq. «Azııa jańǵyryǵy» halyqaralyq tsırk óneri festıvaliniń aıtýly oqıǵasy - festıval qatysýshylarynyń úrmeli orkestr súıemeldeýimen astana kóshelerindegi «Kavalkada» merekelik sherýi. Kavalkada - «Azııa jańǵyryǵy» festıvaline qatysýshy ártisterdiń qala kóshelerindegi merekelik sherýiniń baǵdary: Tsırk - Saryarqa dańǵyly - Bógenbaı batyr dańǵyly - Respýblıka dańǵyly - Tsırk. Ótetin kúni - 30 maýsym. Ýaqyty - 18:00.
