Álemdik brendtiń jasandy aıaq kıimderin Qazaqstanǵa ákelýge tosqaýyl qoıyldy
ALMATY. QazAqparat - Almaty qalasy boıynsha Memlekettik kirister departamentiniń qyzmetkerleri Almaty halyqaralyq áýejaıynda taýarlardy kedendik tekserýden ótkizý barysynda zııatkerlik menshik quqyǵynyń buzylý deregin anyqtady. ıAǵnı, syrtqy ekonomıkalyq qyzmetpen aınalysýshy kásipker taýarlardy Qazaqstanǵa zııatkerlik menshik quqyǵyn buza otyryp ákelgen. Bul týraly búgin Almaty qalasy boıynsha Memlekettik kirister departamentiniń baspasóz qyzmetinen habarlady.
Taýarlar boıynsha usynylǵan deklaratsııaǵa sáıkes, Qazaqstan Respýblıkasyna ákelýge arnalǵan málimdemede modeli men ólshemderi árqalaı «aıaq kıim, sandal (súıretpe)» dep kórsetilgen. Al taýarlardy jóneltýshi el - Túrkııa. Alaıda, jalpy salmaǵy 2 tonnaǵa jýyq bolatyn, «ADIDAS» jáne «REEBOK» taýar belgileri jazylǵan sporttyq aıaq-kıimder Qazaqstanǵa quqyq ıesi tarapynan beriletin tıisti qujattarsyz jetkizilgen.
Qoldanystaǵy zańnamaǵa sáıkes, mundaı taýarlardy shyǵarý 10 jumys kúnine deıin toqtatylady. Eger de álemdik brendterdiń resmı ókilderi taýarlardyń Qazaqstanǵa ákelinýine ruqsat berilgendigin rastamasa, onda ustalǵan taýarlar sot sheshimimen tárkilenedi.
Odan basqa, QR Ákimshilik quqyq buzýshylyq kodeksiniń 535-babyna sáıkes, zııatkerlik menshik quqyǵyn buzý deregi boıynsha ákimshilik jaýapkershilik qarastyrylǵan.
Almaty qalasy boıynsha Memlekettik kirister departamenti zııatkerlik menshik quqyǵynyń saqtalýyn qamtamasyz etý boıynsha turaqty negizde jumystar atqaryp jatyr. Almatyda jyl basynan beri zııatkerlik menshik quqyǵynyń buzylǵandyǵy jóninde 8 derek anyqtaldy. Quqyq buzýshylyq áreketke barǵandar ákimshilik jaýapkershilikke tartyldy.
