Álemdik boks tarıhy jylnamasynyń jańa paraǵyn ashtyń - Elbasy Golovkındi quttyqtady

NUR-SULTAN. QazAqparat - Elbasy Nursultan Nazarbaev Gennadıı Golovkındi IBF jáne IBO tujyrymdary boıynsha orta salmaqtaǵy álem chempıony ataǵyn qorǵap qalýymen quttyqtady. Bul týraly QazAqparat elbasy.kz saıtyna silteme jasap habarlaıdy.

Elbasy Gennadıı Golovkındi Kamıl Sheremetamen jekpe-jekte aıqyn jeńiske jetýimen quttyqtady.

«Osy jeńis arqyly sen óz dıvızıonyńda 21-shi ret álem chempıony atanyp, qazaqstandyq jáne álemdik boks tarıhy jylnamasynyń jańa paraǵyn ashtyń. Bul barsha qazaqstandyqtar úshin Táýelsizdik kúnine oraı tamasha syı boldy dep oılaımyn.

Biz seniń sporttaǵy jarqyn jetistikterińdi, myqty rýhyńdy jáne jeńiske degen jigerińdi maqtan etemiz. Seniń jeńimpaz retinde óz jolyńdy jalǵastyratynyńa senimdimin jáne seniń jetistikterińe áli talaı súısinetin bolamyz», – delingen jedelhatta

Aıta ketsek, búgin IBF/IBO nusqasy boıynsha orta salmaqtaǵy álem chempıony Gennadıı Golovkın (40-1-1,35 KO) qarsylasy Kamıl Sheremetany (21-0, 5 KO) tehnıkalyq nokaýtpen jeńdi. Sondaı-aq, QR Prezıdenti Qasym-Jomart Toqaev Gennadıı Golovkındi jeńisimen quttyqtady.