Álemdik bilim básekesinde jeńiske jetken oqýshylarǵa qansha syıaqy berildi
Muny Ortalyq kommýnıkatsııalar qyzmetinde ótken brıfıngide Oqý-aǵartý vıtse-mınıstri Ǵanı Beısembaev málim etti, dep habarlaıdy QazAqparat tilshisi.
«El Prezıdenti bıylǵy jyldan bastap «Halyqaralyq pándik olımpıada jeńimpazdaryna bir jolǵy aqshalaı syıaqy berý týraly» Zańǵa qol qoıdy. Osy zańǵa sáıkes, altyn medal alǵan oqýshyǵa 1 500 AEK (4,5 mln), kúmis medalǵa 1 000 AEK (3 mln), qola medalǵa 500 AEK (1,5 mln) kóleminde aqshalaı syıaqy taǵaıyndalǵan. Osylaısha, alǵash ret álemdik bilim básekesinde top jarǵan olımpıada jeńimpazdaryna 73 mln teńgeden astam somaǵa syıaqy tabys etildi. Sonymen qatar, alǵash ret halyqaralyq zııatkerlik, shyǵarmashylyq, sporttyq olımpıadalardyń 100-den asa jeńimpazy men júldegerlerine otandyq joǵary oqý oryndaryna «konkýrstan tys» qabyldaý úshin erekshe granttar bólindi», - dep toqtaldy vıtse-mınıstr.
Ǵanı Beısembaevtyń dereginshe, bıyl alǵash ret jas sportshylardyń halyqaralyq jarystarǵa qatysýyna respýblıkalyq bıýdjetten qarajat bólingen. Nátıjesinde qazaqstandyq komanda Frantsııadaǵy Dúnıejúzilik gımnazıadada 86 medal jeńip alyp, 70 eldiń ishinde 3-oryndy ıelengen.
