Álemdik baılyqtyń jartysy Jerdiń 1% halqynyń qolynda
ASTANA. QazAqparat - Kiristegi álemdik teńsizdik ósip keledi, orta tap ókilderiniń sany óte baılardyń paıdasyna azaıyp keledi, sonyń nátıjesinde 2015 jyly álemdik baılyqtyń 50 paıyzyn ǵalamshar halqynyń 1%-y ıelenip otyr. Bul týraly «Vestı Ekonomıkı» basylymy jazǵandaı, shveıtsarııalyq Credit Suisse banki zertteý ortalyǵynyń jańa baıandamasynan belgili bolyp otyr.
Bıylǵy jyldyń esebinde álem halqynyń 50% halqy ortasha alǵanda nebári 3 myń 210 dollarǵa ǵana ıe bolyp otyr. Eger sizde 68 800 dollar bolsa, «toptaǵylardyń» 10 paıyzy qataryna kiresiz, al halyqtyń nebári 1%-yn quraıtyn eń baı adamdardyń ortasha eseppen 759 myń 900 dollardan qarjysy bar.
Qujatta orta tap málimetterine kóńil bólingen. Esepte atap ótigendeı, álemniń eresek halqynyń 14 paıyzy orta tapqa jatady, olardyń aktıvteri 50 000 - 500 000 dollarǵa baǵalanyp otyr.
2015 jyldyń basynda brıtandyq Oxfam qaıyrymdylyq uıymynyń taldamashylary kelesi jyldyń sońyna qaraı álem halqynyń 1 paıyzynyń qalǵan 99 paıyz halyqtan dáýleti kóbirek bolatynyn eskertken bolatyn. Alaıda shveıtsarııalyq bank esebinen baıqalyp otyrǵandaı, bul kórsetkishke ótken jyldyń ózinde qol jetkizildi - sol kezde Davosta álemdik ekonomıka kóshbasshylary kezekti kezdesýinde teńsizdik deńgeıin qysqartýǵa ýáde bergen bolatyn, dep habarlady newsru.com .
