Álemdik balet juldyzdary elordada óner kórsetti
ASTANA. Shildeniń 4-i. QazAqparat - Elordanyń «Qazaqstan» ortalyq kontsert zalynda álemdik balet óneriniń juldyzdary qala qonaqtary men turǵyndaryna óz ónerlerin pash etti.
Astana kúni merekesi qarsańynda ótken dástúrli «Operalııa» halyqaralyq mýzyka festıvaline balet ónerin súıetin elordalyqtar zaldy lyq toltyrdy. Mádenı is-shara barysynda Germanııa, AQSh, Reseı, Túrkııa, Qytaı memleketterinen jınalǵan balet óneriniń maıtalmandary óz ónerlerin kórsetti.
Kesh barysynda «bı patshasy» atanǵan Reseıdiń halyq ártisi Nıkolaı Tsıskarıdze orys kompozıtory Igor Stravınskııdiń mýzykasyna jazylǵan «Nartsıss» bıin oryndap, kórermenniń ystyq yqylasyna bólendi. Astana jurtshylyǵy úshin qytaılyq balet ártisteri, halyqaralyq baıqaýlardyń laýreattary Tsaý Shýtsy men Djang Shıdiń oryndaýyndaǵy A.Adannyń «Jızel» baleti de erekshe tosyn syı boldy.
Sonymen qatar kesh barysynda K.Baıseıitova atyndaǵy Ulttyq opera jáne balet teatrynyń balet trýppasy A.Borodınniń «Knıaz Igor», Nıý-Iork sıtı baletiniń bıshileri Eshlı Býde men Endrıý Veıet L.Gottshalktiń «Tarantella», Berlın Shtatsoperdiń premerleri Elıza Kabrera men Mıhaıl Kanıskın D.Rossınıdiń «Grand pas de deux», túrkııalyq bıshiler, Ankara memlekettik opera jáne balet teatrynyń basty bıshileri Ózge Basharan men Bahrı Gıýrdjan P.Chaıkovskııdiń «Uıqydaǵy arý» baletterinen óner kórsetip, elordalyqtardyń kóńilinen shyqty.
Al atalǵan sharaǵa arnaıy kelgen jerlesimiz Tsıýrıh opera teatrynyń prıma-balerınasy Álııa Tanyqbaeva K.Baıseıitova atyndaǵy Ulttyq opera jáne balet teatrynyń ártisi Serjan Káýikovpen birge A.Adannyń «Korsar» baletinen úzindi sahnalap, jınalǵandardyń zor yqylasyna bólendi.
