Álemdik BAQ «Astana Motorsport» komandasy týraly jaqsy básekeles retinde jaza bastady - A.Rahymbaev (FOTO)
ASTANA. QazAqparat - Aıdyn Rahymbaev basqarǵan «Astana Motorsport»-tyń qazaqstandyq ekıpajy jol talǵamaı júretin kólikter sanatyndaǵy 143 qatysýshynyń arasynda ótken «Dakar-2015» rallı-marafonynda 9-shy orynǵa ıe boldy. Bul týraly shabandoz áleýmettik jeliler arqyly habarlady.
«Dakar-2015 osymen aıaqtaldy. «Astana» komandasy retinde, basty mindetimizdi atqardyq: jol talǵamaıtyn kólikter arasyndaǵy eń bedeldi esepte alǵashqy ret úzdikter «ondyǵyna», al Baýyrjan Isabaev - úzdikter «jıyrmalyǵyna» kirdik. Júk kólikteriniń esebinde Artýr Ardavıchýs 22-shi bolyp keldi. Bul da jaman nátıje emes. Bıylǵy jyly álemdik BAQ «Astana» komandasy týraly myqty básekeles retinde jaza bastady!», - dep jazdy ol Feısbýktegi kúndeliginiń paraqshasynda.
A.Rahymbaev rallıdegi básekelestik óte joǵary bolǵanyn eske saldy.
«Jol talǵamaıtyn kólikter arasynda 143 shabandoz bolǵan, olardyń árqaısysy qandaı da bir oryn alýǵa talasty. Álemniń eń bedeldi jarysynda jol talǵamaıtyn kólikter arasynda men úzdikter «ondyǵyna» kirgenime qýanyshtymyn!», - dep atap ótti shabandoz.
Esterińizge sala keteıik, Aıdyn Rahymbaev basqarǵan «AstanaMotorsport» komandasynyń jol talǵamaıtyn kólikter sanatyndaǵy ekıpajy «Dakar-2015» rallı-marafonynyń qorytyndy esebinde 9-shy orynnan kórindi.
