Álemdik azyq-túlik naryǵyndaǵy jaǵdaı ózgermese aldaǵy onjyldyqta dúnıejúzindegi asharshylyqqa ushyraǵandar sany 1,5-2 esege deıin artýy múmkin
ASTANA. Sáýirdiń 1-i. QazAqparat /Qanat Mámetqazyuly/ - Álemdik azyq-túlik naryǵyndaǵy jaǵdaı osylaı jalǵasa beretin bolsa aldaǵy onjyldyqta dúnıejúzindegi asharshylyqqa ushyraǵandar sany 1,5-2 esege deıin artýy múmkin.
Búgin elordada ótip jatqan Halyqaralyq astyq konferentsııasy barysynda QR Aýyl sharýashylyǵy vıtse-mınıstri Arman Evnıev osylaı málim etti, dep habarlaıdy QazAqparat.
A. Evnıevtyń aıtýynsha, Dúnıejúzilik azyq-túlik uıymynyń eseptik málimetterine sáıkes, búgingi tańda álemdegi asharshylyqqa ushyrap otyrǵan halyqtyń sany 1 mlrd. adamnan asqan. Bul jer shary turǵyndarynyń 6-1 bóligin quraıdy. Eger álemdik azyq-túlik naryǵyndaǵy jaǵdaı osy qalypta jalǵasa beretin bolsa, aldaǵy onjyldyqta kóptegen qıynshylyqtar týyndaýy múmkin. Bul rette, álemdegi asharshylyqqa ushyraǵandar sany 1,5-2 esege deıin artatyny da boljanady.
«Sondyqtan da, aldaǵy ýaqytta álemdik óndiris boıynsha astyq naryǵyndaǵy jaýapkershilik arta túsedi. Óıtkeni, astyq ónimderi azyq-túlik sebeti boıynsha ǵana emes, mal sharýashylyǵy úshin de mańyzdy orynǵa ıe», dedi vıtse-mınıstr.
Sonymen birge, vıtse-mınıstr byltyrǵy jyly qolaısyz aýa raıyna qaramastan Qazaqstandaǵy jalpy astyq jıyny 20 mln. tonnadan asqanyn, bul 2008 jylǵy deńgeıden 34 paıyzǵa kóp ekendigin atap ótti. Onyń aıtýynsha, byltyrǵy kórsetkish eldiń eksporttyq áleýetin 12,5-13 mln. tonnaǵa jetkizýge múmkindik beredi.
