Álemdik áýe keńistigine NQZ kody engizilgenine 1 jyl boldy
NUR-SULTAN. QazAqparat – Nursultan Nazarbaev halyqaralyq áýejaıy álemdik áýe keńistigine NQZ kodymen tirkelgenine bir jyl boldy, dep habarlaıdy QazAqparat tilshisi.
2020 jyldyń 8 maýsymynda Nursultan Nazarbaev halyqaralyq áýejaıy halyqaralyq áýe kóligi qaýymdastyǵynan (IATA) NQZ degen jańa kod alǵan bolatyn. Sodan beri áýe bıletterin brondaýdyń barlyq júıelerinde áýejaıdyń NQZ jańa kody qoldanylyp keledi. Sondaı-aq, jolaýshylar basqa áýejaılardan ushyp shyqqan kezde de osy kodty bıletterden, otyrǵyzý talondary men júk bırkalarynan kórip júr.
Áýejaıdyń jańa kodpen jumys bastaǵan sáti pandemııa kezeńimen tuspa-tus kelgen bolatyn. COVID-19 pandemııasynyń saldarynan halyqaralyq jolaýshylar tasymaly qatty quldyrap, naryq júk jáne tranzıttik reısterge basymdyq berýge májbúr boldy. Bul tásildi Nursultan Nazarbaev halyqaralyq áýejaıy da utymdy paıdalanyp, qysqartýlarǵa jol bergen joq. Sonyń arqasynda barlyq óndiristik personal saqtaldy.
Ýaqyt talaby karantındik shekteýlerdiń aıasynda jolaýshylarǵa qyzmet kórsetý tájirıbesin qysqa merzim ishinde jetildirip, saparlardy sapaly uıymdastyrýdy qajet etti. Áýeli teplovızorlardyń avtomatty júıesi engizilip, búkil aýmaqta áleýmettik qashyqtyqty saqtaıtyn belgiler ornatyldy.
«Betperde taǵý rejımi, kiretin jáne shyǵatyn jolaýshylar toptaryn bólý, halyqaralyq reısterdiń jolaýshylaryna saýalnama júrgizý, shetelden keletin meımandardan PTR-test talap etý sharalary kún saıyn jetildirilip keledi. Búginde áýejaı ǵımaratyna ótý Ashyq qosymshasy arqyly júzege asyrylady. Jolaýshylar men elorda qonaqtaryna yńǵaıly bolý úshin GrinLab testileý ortalyǵynda PTR jáne IFT ádisterimen COVID-19 ınfektsııasyna testileýden ótý qyzmeti qoljetimdi», - dep jazady áýejaıdyń baspasóz qyzmeti.
Halyqaralyq áýejaıdyń resmı derekterine súıensek, jolaýshylar reısteriniń qysqarýy kásiporynnyń kirisine áser etpegen. Byltyr áýejaı shaǵyn jáne orta bızneske shamamen 1 mlrd teńgeniń qoldaýyn kórsetip, bıyl 1 qańtardan bastap 30 maýsymǵa deıin kommertsııalyq alańardy jalǵa alýshylardyń 650 mln teńge tólemin shegergen.
Pandemııa órship turǵan kezde shet memleketterden kelgen qaıyrymdylyq kómekter osy áýejaı arqyly jetip turdy.
Aılaqtyń 2035 jylǵa deıingi damý strategııasy boıynsha mýltımodaldyq júk tasymaly ortalyǵyn, e-commerce qyzmet kórsetý ortalyǵyn jáne erkin saýda aımaǵyn qurý josparlanýda. Jolaýshylar aınalymy men reısterdi ulǵaıtý, marshrýttyq jelini keńeıtý, tranzıttik tasymaldardy damytý kózdelip otyr.
Áýejaı Eýropalyq odaq elderiniń aýmaǵyna avıatsııalyq júk tasymaldaryn uıymdastyrýǵa múmkindik beretin RA-3 (Regulated Agents Third country) sertıfıkatyn alǵan. Osynyń arqasynda áýe kompanııalary avıatsııalyq qaýipsizdik boıynsha eshbir shekteýsiz Nur-Sultannan Eýroodaq elderine júk tasymaldaı alady.
NQZ kodymen jumys istegen bir jyldyń ishinde áýejaı 1500-den astam tranzıttik jáne júk reısterine qyzmet kórsetken. Eń kóp ımporttalǵan taýar gúl bolsa, eń kóp eksporttalǵan taýar et bolǵan. Pandemııa kezindegi shekteýlerge qaramastan Ras-El-Haım (Scat) jáne Kýtaısı (Fly Arystan) baǵyty boıynsha jańa reıster ashyldy.
Búginde áýejaı aýmaǵynda qonaqúı de jumys istep tur. Servıs pen qyzmet sapasyn arttyrý maqsatynda qonaq úı aýtsorsıngtik qyzmet kórsetýge berildi. Qonaq úıde standart, jartylaı lıýks jáne lıýks standartty 16 jaıly nómir bar.
Ushý qaýipsizdigin qamtamasyz etý úshin áýejaı jyl saıyn ushý-qoný jolaǵyna jóndeý júrgizip keledi. Degenmen sońǵy 17 jyl ishinde bir de bir ret jolaqqa kúrdeli jóndeý júrgizilmegen eken.
«Qazirgi ýaqytta ushý-qoný jolaǵy men perrondy qaıta jańartýǵa jobalyq-smetalyq qujattama daıyndaý josparlanyp otyr», - delingen áýejaıdyń baspasóz qyzmeti taratqan resmı málimette.
