Álemdik ahýalǵa qaramastan byltyr ekonomıkalyq ósim 6 paıyzdyq deńgeıde qamtamasyz etildi - S. Ahmetov
ASTANA. QazAqparat - Álemdik ahýalǵa qaramastan byltyr ekonomıkalyq ósim 6 paıyzdyq deńgeıde qamtamasyz etildi. Búgin QR Prezıdenti N. Nazarbaevtyń qatysýymen ótip jatqan Úkimettiń keńeıtilgen otyrysynda baıandama jasaǵan QR Premer-Mınıstri Serik Ahmetov osylaı málimdedi.
«Esepti kezeń ishinde Úkimettiń jumysy «Qazaqstan-2050» strategııasyndaǵy mindetterdi iske asyrýǵa baǵyttaldy. Álemdik ekonomıkadaǵy qolaısyz jaǵdaılarǵa qaramastan, bizdiń elimiz damý qarqynyn saqtap qaldy. Buǵan eń aldymen Elbasynyń tapsyrmasymen qabyldanǵan daǵdarysqa qarsy sharalar men ındýstrııalandyrý baǵdarlamasynyń nátıjesinde qol jetti», -dedi Premer.
Úkimet basshysynyń aıtýynsha, álemdegi ekonomıkalyq jaǵdaı áli de turaqsyz bolyp qalýda. Ekonomıkanyń baıaý ósimi men damyǵan elderdegi jumyssyzdyqtyń joǵary deńgeıi, boryshtyq problemalar ekonomıkalyq belsendilikke keri áserin tıgizip keledi. Ornyqsyz jahandyq suranys álemdik taýar naryǵyna boljamsyzdyq ákelýde, bul qazaqstandyq eksportqa da áserin tıgizip jatyr.
«Bul - bizdiń ekonomıkamyz úshin aıtarlyqtaı salmaqty synaq. Eń aldymen bizdiń syrtqy ekonomıkalyq sektorymyz úshin. Al byltyrǵy jyly qazaqstandyq eksport aýqymy 4,6 paıyzǵa kemidi. Degenmen, Elbasynyń aıqyndaǵan strategııalyq ekonomıkalyq baǵdary arqasynda biz damýdyń oń úderisin saqtap qaldyq. Onyń ishinde jalpy ishki ónim 6 paıyzdyq deńgeıde qamtamasyz etildi. Al ınflıatsııa 4,8 paıyzda boldy. Jumyssyzdyq 5,2 paıyzdy qurady», - dedi S. Ahmetov.
