Álemdi jaılaǵan soǵysty kóre tura óz sezimimdi ánmen jetkizgim keldi – Dımash Qudaıbergen
Baspasóz konferentsııasynda jankúıerleri Dımash Qudaıbergenge «Án arqyly halyqqa qandaı da bir oıdy jetkizýge bolatynyna senesiz be?» degen saýal qoıdy.
«Osydan úsh jyl buryn, sol 25 shamasynda «Bir aspan taǵdyry» dep atalatyn shyǵarma jaǵzan bolatynmyn. Bul joba arqyly álemde bolyp jatqan kóp soǵysty kóre tura soǵan qatysty óz sezimimdi jetkizgim keldi. Álemde bir-birimizge qurmet kórsetýdiń qanshalyqty mańyzdy ekenin, bir-birimizdi qalaı súıý kerektigin kórsetýimiz kerek. Jýrnalıster menen soǵys týraly kózqarasymdy jıi suraıdy. Men úshin jaman ult joq. Maǵan adamnyń qazaq, úndis, amerıkalyq, qytaı, ýkraın, frantsýz, ózbek, qyrǵyz nemese orys ultynan ekeni mańyzdy emes. Biz bárimiz bir qudaıdyń balasymyz. Sondyqtan 25 jasymda osyndaı joba jasadym», - dep jaýap berdi Dımash Qudaıbergen.
Sonymen qatar, konferentsııaǵa qatysýshylar óner ıesinen qaıdan shabyt alatynyn surady. Dımash Qudaıbergen bul qubylystyń tylsym ekenin málim etti.
«Myna álemde bolatyn qubylystyń bári jaratqan ıemizden. Bizdiń talantymyz ben darynymyz bizge tıesili emes, qudaıǵa tıesili. Án nemese stsenarıı jazǵan kezde shabyt qaıdan keletinin áli kúnge túsine almaı kelemin. Ony men dóp basyp, osyndaı sátte, osyndaı kóńil-kúıde ǵana keledi desem, ótirik bolady. Tylsym, óz basym túsinbeımin», - dep túıindedi otandyq ánshi.
Eske salaı keteıik, keshe álemdik deńgeıdegi ánshi Dımash Qudaıbergen Shanhaı yntymaqtastyq uıymyna múshe elder kınofestıvaline qatysý úshin Úndistanǵa saparmen barǵanyn habarlap edik.
Atalǵan kınofestıval Mýmbaı qalasynda 27 qańtarda bastalyp, 31 qańtarǵa deıin jalǵasady. Kınofestıval barysynda ShYU elderinen 57 fılm usynylady.
Dımash Qudaıbergen onda Qazaqstan atynan qazylar alqasynyń quramynda bolady.
