Álemdi jaýlaǵan joba endi Qazaqstanda
ASTANA. 18 naýryz. QazAqparat - Jýyrda qaraorman qazaqtyń kóńilinen shyǵady degen jańa telejobanyń tusaýy kesilmek. Elimizde buryn sońdy bolmaǵan tyń týyndy «Juldyzdy sát» dep atalady.
«Jańalyǵy kóp jańa baǵdarlama naýryzdyń 23-i kúni ulttyń joǵyn joqtap, muńyn muqtap júrgen «Qazaqstan» Ulttyq arnasy arqyly kórermenge jol tartady. Jobanyń túp negizi ózge elden alynǵanmen ózindik ereksheligi bar, qazaqı nyshany basym. Ózgeshe jobany tamashalaý arqyly halyqtyń rýhanı deńgeıi men onyń qajettiligin ańǵarýǵa bolady. Sebebi, «Juldyzdy sát» kózden tasa júrgen erekshe daryn ıelerin qalyń elge tanytýdy maqsat etedi. Al Altaıdan Atyraýǵa deıin sozylǵan ulan baıtaq qazaq dalasynda ondaı talanttardyń mol ekeni aıdan anyq. Áıtsede halyq arasyndaǵy sol týma talanttardyń tanylmaı júrgeni qanshama?! Endi ózgelerden oq boıy ozyq turǵan ónerdi dáleldeýdiń, dúıim jurtqa pash etýdiń úlken múmkindigi týdy. «Qazaqstan» Ulttyq arnasy usynyp otyrǵan jańa joba «Juldyzdy sát» el ishinde júrgen beımálim daryndardyń juldyzyn jaǵyp, baǵyn ashady. Bul baǵdarlamanyń túp negizi aǵylshyn jerinde qalanǵan "Britain's Got talante" ıaǵnı "Brıtanııa talantarǵa toly" atty megajoba negizinde qolǵa alyndy. Álemniń 40-qa tarta elin tamsandyrǵan dúbirli dodanyń qazaqsha nusqasynda elimizdiń ár qıyrynan kelgen myńdaǵan úmitker baq synaıdy. Olar aramyzda júrgen qarapaıym adamdar men ár salanyń mamandary. Úmitkerler tamyljyta án saldy, túrli aspaptarda oınap, myń burala bıledi. Arasynda adamnyń oıyna túspeıtin kez kelgenniń qolynan kelmeıtin ónerimen tańdaı qaqtyratyn úmitkerler bar. Aıryqsha ónerimen ózara saıysqa túsetin ónerpazdar birneshe kezeńnen ótip, aqtyq synǵa deıin jetýi tıis. Qysqasy estimegen elde kóp dúnıege kýá bolasyz. Bas júlde 5 mln. teńge.
Ónerpazdarǵa tórelik etetin qazylar alqasynyń quramynda QR Halyq ártisi Tuńǵyshbaı ál Tarazı, QR eńbek sińirgen ártisi Maıra Muhamedqyzy men Sıdneı olımpıadasynyń júldegeri Islam Baıramýqov bar. Halyq danalyǵy «ónerge árkimniń-aq bar talasy» degendi tegin aıtpasa kerek. Jumyr basty pendeniń kez kelgeni shama-sharqy jetkenshe óziniń ózgelerden erekshe ekenin dáleldegisi keletini tabıǵı zańdylyq. «Juldyzdy sátte» qýanyshtan jylaǵandar men jobadan tys qalǵany úshin kóz jasyna erik bergenderdiń, eriksiz ezý tartarlyq kórinister men ár túrli taǵdyr ıeliriniń ónerin tamashalaı alasyz. «Buryn sońdy bolmaǵan jańa joba «Qazaqstan» Ulttyq arnasynan ár senbide, saǵat 21:05 kórsetiledi. Al jeksenbi kúni saǵat 12.25 qapy qalǵandar nemese qyzyqqa toımaǵandar úshin baǵdarlama qaıtalap usynylady. Ár beısenbide osy jobanyń kúndeligin kórińizder. Basty baǵdarlamaǵa enbeı qalǵan qyzyqty sátterdi kúndelikte qamtýǵa tyrystyq. Barlyq kórermendi, aǵaıyn-týysty «Juldyzy sátti» tamashalaýǵa, baǵy janǵan daryndarmen birge qýanýǵa jáne olardy qoldaýǵa shaqyramyz!», - dep habarlady Ulttyq arnadan.
Megajobanyń dırektory Kenje Jumanuly.
