Álemdi jalǵyz aralap júrgen rýmyndyq saıahatshy: Anamdy kórmegeli úsh jyl boldy
QOSTANAI. QazAqparat – Álemdi jaıa sharlap júrgen rýmyndyq jıhankez Bogdan Veselovskı Qostanaı oblysyna keldi. 31 jastaǵy týrıst QazAqparat tilshisine bergen suhbatynda óziniń saıahattaýdaǵy maqsatyn aıtyp berdi.
– Bogdan, osyǵan deıin álemniń qansha elinde boldyńyz.
– 61 elge saıahat jasadym. Qostanaıǵa, jalpy, Qazaqstanǵa Aqtaý porty arqyly keldim. Sodan keıin Oral, Aqtóbe qalalaryna bardym.
– Saıahattaýdy qashan bastadyńyz? Qandaı maqsat qoıdyńyz?
– Alǵashqy saparymdy 2012 jyldyń jazynda bastadym. Meni ájem men ápkem shabyttandyrdy der edim. Al anam bastapqyda qarsy boldy. Ony kórmegeli úsh jyl boldy. Ol Italııada turady. Aýqymdy saıahatym eriktiler tobymen birigip, Afrıkaǵa jasaldy. Men onda aǵylshyn tilinen sabaq berdim. Biraz ýaqyt ótken soń álemniń basqa elderine barý qyzyǵýshylyǵy paıda boldy. Qazir, mine, kóbine jaıaý júremin. Sharshaǵan kezde avtostop arqyly jetemin. Negizi kóp júrgen saıyn, álemniń qanshalyqty úlken jáne sizdiń ómirińizdiń sonshalyqty qysqa ekenin túsinesiz. Sol sebepti de, adamdar bir-birine meıirimdi bolý tıis dep oılaımyn.
– Saıahatqa qalaı daıyndaldyńyz? Kerek-jaraqtaryńyz bir sómkege syıdy ma?
– Bul suraqty maǵan kezdesken adamdardyń bári qoıady. Mynadaı keńes berer edim: kempıng jıyntyǵy, smartfon, qalam men qaǵaz, karta, sý ótkizbeıtin kúrteshe jáne jaqsy aıaq kıim bolsa, siz – saıahatshysyz! Qorqýdyń qajeti joq.
– Kúnine shamamen qansha aqsha jumsaısyz?
– Bir kúnge 5-6 dollar jetedi. Al Qazaqstanda 2 000 teńge jumsaımyn. Kórgen elderimniń ishinde eń qonaqjaıy – Qazaqstan. Bul shyn sózim. Aqtaýda, Oralda, Aqtóbede úılerine shaqyryp, qonaq etkender boldy. Olarǵa rızamyn.
– Saıahattaý barysynda qandaı qıyndyqtarǵa tap boldyńyz?
– Ondaı kóp. Máselen, Chılıdiń Patagonııa taýynda qatty jel soǵyp, jaraqat alyp qaldym. Zambııada pildi, Paragvaıda aıýdy keziktirdim. Mundaı jaǵdaılardy keıin Instagram-daǵy paraqshamda áńgimelep beremin.
– Suhbatyńyzǵa rahmet! Saıahatyńyz sátti ótsin.
