Álemdi jaqsartamyz: Qarapaıym qazaqstandyqtar beınerolıktiń keıipkerine aınaldy

Janar Ramazanova Astana qalasynyń otbasylyq aýla klýbtaryna keletin balalarǵa mýzyka sabaǵynan dáris beredi. «Mýzyka adam janyn emdeıdi, tárbıeleıdi, ómirdegi jaqsylyqqa senip, alǵa qaraı talpynýǵa múmkindik beredi. Qysqasha aıtqanda, men balalarǵa mýzyka úıretemin, olar meni ómirge úıretedi», - deıdi Janar Ramazanova.

Al jas ónertapqysh Sanjar Pernebaev qoqys jáshikteriniń júktelý dárejesin qadaǵalaıtyn júıeni oılap tapqan. Qazir ol ǵalamdyq jańalyq ashýdy armandaıdy. «Bolashaqta búkil álemge paıdaly bolatyn joba oılap tapqym keledi. Men qoǵamnyń damýyna óz úlesimdi qosqym keledi jáne bunyń qolymnan keletindigine senemin», - dedi Sanjar.

Bos ýaqytynyń barlyǵyn Ekinshi dúnıejúzilik soǵysy ardagerlerine kómek kórsetýge arnaǵan Andreı Parhomenko eriktiler isin álemge degen jańa kózqaras dep baǵalaıdy. «Ardagerlerge kelip jaı ǵana áńgimelesýdiń ózi, olar úshin óte qymbat. Keıde ardagerlerge azyq-túlik ákelgen kezde olar bizden: «Al búgin qandaı mereke?», - dep suraıdy», - deıdi ol.

Aınur Nurhojaeva - tserebraldy sal aýrýyna shaldyqqan balalardy emdeýdi óz ómiriniń ajyramas bóligine aınaldyrǵan dáriger. Aınurdyń aıtýynsha, balanyń dıagnozyn eń birinshi ret estigen kezde, ata-ananyń qasynda eń jaqyn janashyr adamy bolýy kerek. «Men árdaıym balalarǵa kómektesýge tyrysamyn jáne osy baǵytta múmkindikter men damý joldaryn izdestiremin», - deıdi dáriger.

Beınerolıktegi keıipkerler óz isin súıetin jáne tańdaǵan baǵytynda nyq júretin shynaıy qalpynda kórsetilgen. Ár oqıǵanyń artynda kómek pen qoldaý alǵan myńdaǵan taǵdyrdyń kórinisi bar. Ol - muǵalim men oqýshy, dáriger men ata-ana, jáne bizdiń qymbatty ardagerlerimiz. Qorytyndylaı kelgende, bul keıipkerlerdiń minezin ashatyn, olardyń maqsatyn kórsetetin shaǵyn derekti fılm.