«Álemdi ózgertetin ıdeıalar» semınarynyń alǵashqy sertıfıkattary tabystaldy (FOTO)
«Álemdi ózgertetin ıdeıalar» atty bilim berý jobasy - Memleket basshysy N.Nazarbaevtyń bes ınstıtýtsıonaldyq reformasyn júzege asyrý úshin ázirlengen «100 naqty qadam» Ult josparyn zerdelep, osy baǵytta naqty ıdeıalarǵa serpin berý maqsatynda bastalǵan joba.
«Joba aıasynda uıymdastyrylǵan negizgi sharalardyń biri - elimizdiń óńir-óńirinen kelgen oqýshylar men stýdentterge arnalǵan semınar-trenıng boldy. Aımaqtardaǵy ýnıversıtetter men orta bilim uıymdarymen jasaǵan kelisimge saı, ár oblystan 25 jas kelip, trenıngke qatysýy kerek. Bir kelgende eki oblystyń jastaryn qabyldaımyz»,-deıdi joba týraly aıta kele Tuńǵysh Prezıdent kitaphanasy dırektorynyń orynbasary Japsyrbaı Qýanyshev.
Uıymdastyrýshylardyń aıtýynsha, alǵashqy semınar 1 qazannan bastalǵan. Jalpy, kelesi jyldyń 1 shildesine deıin barlyq aımaqtan ótinish bergen stýdentter men oqýshylar osy trengıngke qatysyp úlgerýi kerek.
«Bolashaǵymyz jastardyń qolynda dep kóp aıtamyz, mine, sondyqtan da, jastar búginnen bastap-aq qandaı salada qyzmet etetinin, ol salaǵa qandaı jańalyqtar ákeletinin oılana berýi kerek. «Álemdi ózgertetin ıdeıalar» atty semınar-trenıngte osy jáne ózge de máseleler boıynsha jastar arasynda pikir almasý ótedi. Lajy bolsa, óńirlerdegi oqý oryndary áleýmettik jobalarǵa belsendi aralasyp júrgen, oqýda ozat jastardy tańdap jiberse eken», - deıdi kitaphana ókili.
Aıta keteıik, 1 qazannan bastap elordanyń oqý oryndary men mektepterinen 100 bala osy semınar-trenıngke qatysqan. 15-16 qazan kúnderi trengıngke Almaty qalasy men Ońtústik Qazaqstan oblysynyń jastary jınalsa, 20-23 qazan kúnderi shyǵys jáne batys óńirleriniń jastary ıdeıalar almasady.