«Álemdi ózgertetin ıdeıalar» baıqaýynyń jeńimpazdary marapattaldy

Oǵan barlyq óńirlerden Nazarbaev zııatkerlik mektebiniń ustazdary qatysty. Qyrkúıek aıynda bastalǵan baıqaýdyń eń úzdik materıaldary QR Tuńǵysh Prezıdenti - Elbasynyń kitaphanasyna joldandy.

Іrikteý kezeńine jalpy 49 muǵalim qatysty. Olar N.Nazarbaevtyń 22 eńbegi boıynsha 40 jobany usynǵan bolatyn. Qatysýshylar Qazaqstan Respýblıkasynyń Tuńǵysh Prezıdentiniń kitaptary boıynsha ádistemelik zertteýlerin usyndy.

«Sharanyń basty maqsaty - Qazaqstan Respýblıkasynyń Tuńǵysh Prezıdenti - Elbasynyń «100 naqty qadam» Ult Josparynda belgilegen ıdeıalary men bastamalaryn zerttep, bilim berý barysynda ınnovatsııalyq turǵyda qoldaný. Bizdiń ustazdar óz eńbekterin ádistemelik qural retinde daıyndap, onda eń bastysy Nazarbaevtyń eńbekterinde aıtylǵan reformalardyń kim úshin jasalyp jatqanyn, onyń ne maqsat kózdegendigin túsindirgen. Jas mektep oqýshylary sol quraldar arqyly Elbasynyń basty degen eńbekterin uǵyna alady. Ult Kóshbasshysynyń eńbekteri men kitaptary jas urpaq úshin jeke tulǵa retinde qalyptasýǵa úlken serpin beredi», - deıdi Ult Kóshbasshysy kitaphanasynyń dırektory Beısembaı Jumabekov.

Shara Qazaqstan Respýblıkasynyń Bilim jáne ǵylym mınıstrliginiń, «Nazarbaev zııatkerlik mektepteri» derbes bilim berý uıymy ókilderiniń uıymdastyrýymen ótken edi. Baıqaý jeńimpazdaryna jáne nomınanttaryna sertıfıkattar men estelik syılyqtar tabystaldy.