Álemdi meıirim qutqarady...
Qadirli jerlesterim, baǵa jetpes baılyǵym – halqym! Qazir biz asa aýyr kezeńde turmyz. Mundaı synı shaqta qazaqqa aýyzbirlik aýadaı qajet.
Óıtkeni máńgilik eldiń basty qýaty – onyń birliginde, qıyndyqty tabandylyqpen eńsere alýynda. Ulan baıtaq qazaq jerin aq naızanyń ushymen, aq bilektiń kúshimen saqtap qalǵan babalar jeńisiniń basty kilti – osy birliginde bolatyn. Alaýyzdyqqa boı aldyrǵan talaı memlekettiń toz-toz bolyp, jer betinen joq bolyp ketkenine kári tarıh kýá. Sodan sabaq alýymyz kerek. Óıtkeni búgingi bizdiń betpe-bet kelip otyrǵan jaǵdaıymyz da maıdannyń bir túri. Qarý alyp soǵys dalasyna shyqpaǵanymyzben, aqyl-parasat, sana men mádenıettiń synǵa túser shaǵy.
Sondyqtan da Prezıdentimiz Qasym-Jomart Toqaevtyń qabyldap jatqan sheshimderine tolyq qosylyp, bir jaǵadan bas, bir jeńnen qol shyǵaratyn asa jaýapty, kezek kúttirmes kezeńge keldik. Qazirgi jaǵdaıda bárimizdi jeke bas múddesi emes, tutas ult bolyp qalý máselesi alańdatýy kerek. Al eńseli el bolyp, qanatymyzdy keńge jaıýymyz qazaqtyń amandyǵyna, ıaǵnı árqaısymyzdyń ult aldyndaǵy jaýapkershilikti sezinýimizge tikeleı baılanysty. Sebebi bul jaǵdaıdaǵy bizdiń árbir salǵyrt áreketimiz, nemquraıly nıetimiz erteń orny tolmas ókinishke alyp kelýi múmkin.
Ras, qazir halyq sharasyzdyqtan ashýǵa boı aldyrǵan. Qorqynysh pen úreı basym. Ol zańdy da. Alaıda bul úreı tek óz ómiri men jaqyndarynyń saýlyǵy úshin ǵana emes, tutas ulttyń amandyǵymen astasyp jatýy kerek. Bizge qazir meıirim aýadaı qajet. Bir-birimizge degen qamqorlyq, jylylyq hám aýyzbirlik qana bul ajdaha indettiń qursaýynan aman alyp qala almaq.
Іndet elimizdegi baılar men kedeıler arasyndaǵy teńsizdikti, adamdardyń turmysy arasyndaǵy alshaqtyqty aıqyn kórsetip berdi. Júrekti aýyrtatyn da osy jaǵdaı. Bizge endi shynymen oılaný kerek. Adam baılyqty qansha jıǵanymen, qattalǵan qazynasyn qyzǵyshtaı qoryǵanymen, qara jerge ózimen birge alyp kete almaıdy. Esesine, osyndaı qıyn shaqta muqtaj jandarǵa qol ushyn sozyp, mol saýapqa kenele alady. ıAǵnı ómirdiń máni – baılyqta emes, denniń saýlyǵynda, adamzattyń amandyǵynda eken. Álemdi jaılaǵan myna jaǵdaı sol peıilimizdiń kórinisi shyǵar bálkim, kim bilsin?
Óıtkeni búgingi zamanda adamnyń peıili tarylyp, qý dúnıeniń quly bolyp ketti. Sonyń saldarynan meıirim, júrek, jan jylýy syndy adamı aıaýly sezimder, rýhanı qundylyqtardyń qadiri de quldyrady. Bul indet osy nıetimizdi túzep, ár adamnyń ómir máni týrasynda oılanýyna jiberilgen synaq pa dep te oılaımyn. Kún saıyn estirtip jatqan ólim men joqtaý saı-súıegińdi syrqyratady. Jaratqan ıem jaqyndarymyzdy joǵaltýdan, qazaqtyń qynadaı qyrylýynan saqtaǵaı!
Oılansaq eken! Túısikpen túsinsek eken. Ár adam óz áreketi, saqtyq sharalaryn saqtaýy arqyly kúlli álemdi qutqarýǵa septese alatyndyǵyn uǵynsa eken. Halqym toı-tomalaqty, jıyn-basqosýlardy shekteı turyp, ult saýlyǵyn birinshi orynǵa qoısa degen úlken tilegim bar.
Túsinemin, aılar boıy tórt qabyrǵaǵa qamalyp otyrý ońaı emes. Biraq qıyn da bolsa bul synaqqa tózýimiz qajet. Elimizdiń erteńi, jastardyń bolashaǵy úshin! Mine, 4 aıdan asa ýaqyt úıde otyrmyn. Men de ábden jalyǵyp kettim. Biraq amal qansha?! Tózýimiz kerek! Sebebi árqaısymyzdyń áreketimizdiń artynda ulttyń bolashaǵy, barsha adamzattyń amandyǵy tur. Prezıdentimiz Qasym-Jomart Toqaev ta osy bir qıyn jaǵdaıdan shyǵýdyń jolyn izdep shyryldap júr. Elimizdiń tizginin ustaǵan arda azamatqa dál qazirgi qıyn shaqta qoldaý bildirýimiz kerek.
Ultymyzdy aman alyp qalý deıtin uly ıdeıanyń, maǵynaly maqsattyń tóńiregine uıysýymyz kerek. Árbir adam, qyzmetker osy syndy eńserý úshin de janyn salýy, adal qyzmet etýi qajet. Olaı bolmaıynsha, jaǵdaıymyz qıyn. Jolaıryqqa kelip turmyz ba dep te oılaımyn keıde. Ótkende Prezıdent aıtqandaı, qazir toı toılaıtyn emes, tutas ult bolyp uıysýdyń, aman qalýdyń jolyn oılap, izdeıtin ýaqyt.
Qazaqshylyqty qoıyp, adamshylyqqa kóshýimiz kerek! Óıtkeni álemdi meıirim men adamshylyq qana qutqara alady! Osyny bir sátte esimizden shyǵarmasaq eken!
Alla laıym amandyǵymyzdan aıyrmasyn!
Asanáli Áshimov,
KSRO jáne Qazaqstannyń halyq ártisi, Qazaqstannyń Eńbek Eri, Memlekettik syılyqtyń laýreaty
